ഫൈസാബാദ് (പട്ടിക്കാട്): പാണക്കാട് സയ്യിദ് ഹൈദരലി ശിഹാബ് തങ്ങളുടെ നേതൃത്വത്തില്‍ മജ്‌ലിസുന്നൂര്‍ വാര്‍ഷിക സംഗമം ഇന്നു മഅ്‌രിബ് നിസ്‌കാര ശേഷം പട്ടിക്കാട് ജാമിഅ നൂരിയ്യയില്‍ നടക്കും. കേരളത്തിനകത്തും പുറത്തുമായി വ്യാപിച്ച ആറായിരത്തോളം മജ്‌ലിസുന്നൂര്‍ സദസുകളുടെ വാര്‍ഷിക സംഗമം കൂടിയാണിത്. സുന്നീ യുവജന സംഘത്തിനു കീഴില്‍ സംഘടനാ ഘടകങ്ങളും പിന്നീട് മഹല്ലു തലങ്ങളിലും മാസാന്ത ആത്മീയ സംഗമമായാണ് മജ്‌ലിസുന്നൂര്‍ നടന്നുവരുന്നത്.

പാണക്കാട് സയ്യിദ് ഹൈദരലി ശിഹാബ് തങ്ങള്‍ നേതൃത്വം നല്‍കുന്ന സദസില്‍ സയ്യിദ് സ്വാദിഖലി ശിഹാബ് തങ്ങള്‍, സയ്യിദ് അബ്ബാസലി ശിഹാബ് തങ്ങള്‍, സമസ്ത ജനറല്‍ സെക്രട്ടറി കെ. ആലിക്കുട്ടി മുസ്‌ലിയാര്‍, അത്തിപ്പറ്റ മൊയ്തീന്‍ കുട്ടി മുസ്‌ലിയാര്‍, വാവാട് കുഞ്ഞിക്കോയ മുസ്‌ലിയാര്‍, ഏലംകുളം ബാപ്പു മുസ്‌ലിയാര്‍ തുടങ്ങി നിരവധി സാദാത്തുക്കള്‍, സൂഫീവര്യന്‍മാര്‍, സമസ്ത മുശാവറ അംഗങ്ങള്‍, സമുന്നത മതപണ്ഡിതന്‍മാര്‍, വിവിധ ഭാഗങ്ങളില്‍ മജ്‌ലിസുന്നൂറിനു നേതൃത്വം നല്‍കുന്ന അമീറുമാര്‍ സംബന്ധിക്കും. എസ്.വൈ.എസ് സംസ്ഥാന ജനറല്‍ സെക്രട്ടറിയും മജ്‌ലിസുന്നൂര്‍ അമീറുമായ സയ്യിദ് മുഹമ്മദ് കോയ തങ്ങള്‍ ജമലുല്ലൈലി ആമുഖ ഭാഷണം നടത്തും. ഹസന്‍ സഖാഫി പൂക്കോട്ടൂര്‍ ഉദ്‌ബോധന പ്രസംഗം നടത്തും. മജ്‌ലിസുന്നൂറിനു പങ്കെടുക്കാനെത്തുന്നവര്‍ അംഗസ്‌നാനം ചെയ്തു മഅ്‌രിബ് ബാങ്കിനു മുന്‍പായി ജാമിഅ ഗ്രൗണ്ടില്‍ പ്രവേശിക്കണമെന്നും മുസ്വല്ല കരുതണമെന്നും സംഘാടക സമിതി അറിയിച്ചു.

സമ്മേളന നഗരിയില്‍ ഇന്ന്: രാവിലെ 10ന് അലുംനി മീറ്റ് സമസ്ത ഉപാധ്യക്ഷന്‍ എം.ടി അബ്ദുല്ല മുസ്‌ലിയാര്‍ ഉദ്ഘാടനം ചെയ്യും. ഉമര്‍ ഫൈസി മുക്കം അധ്യക്ഷനാകും. ഇസ്‌ലാമിക കര്‍മ്മശാസ്ത്രം സമീപനവും മുന്‍ഗണനാ ക്രമവും എന്ന വിഷയത്തില്‍ നടക്കുന്ന ചര്‍ച്ചയ്ക്ക് അബ്ദുല്‍ ലതീഫ് ഫൈസി പാതിരമണ്ണ നേതൃത്വം നല്‍കും. ഉച്ചയ്ക്ക് രണ്ടിന് ഓസ്‌ഫോജ്‌ന സെന്‍ട്രല്‍ കൗണ്‍സില്‍ നടക്കും. വൈകീട്ട് നാലിന് പണ്ഡിത ദര്‍സില്‍ സി.കെ.എം സ്വാദിഖ് മുസ്‌ലിയാര്‍ അധ്യക്ഷനാകും. സമസ്ത ട്രഷറര്‍ സയ്യിദ് മുഹമ്മദ് ജിഫ്്‌രി മുത്തുക്കോയ തങ്ങള്‍ ഉദ്ഘാടനം ചെയ്യും.സയ്യിദ് സാബിഖലി ശിഹാബ് തങ്ങള്‍ ആമുഖ പ്രസംഗം നടത്തും.

മുശാഅറ
മത്സരം നാളെ

ഫൈസാബാദ് (പട്ടിക്കാട്): ജാമിഅ സമ്മേളന ഭാഗമായി നൂറുല്‍ ഉലമ സംഘടിപ്പിക്കുന്ന ദേശീയ മുശാഅറ മത്സരം നാളെ നടക്കും. രജിസ്റ്റര്‍ ചെയ്ത ടീമുകള്‍ വെള്ളിയാഴ്ച വെകീട്ട് നാലിന് റിപ്പോര്‍ട്ട് ചെയ്യണമെന്ന് സംഘാടകര്‍ അറിയിച്ചു. കൂടുതല്‍ വിവരങ്ങള്‍ക്ക് 7034321234, 9745322030.

ജാമിഅ ജൂനിയര്‍ ഗ്രാന്റ് ഫെസ്റ്റ്:
പുത്തനങ്ങാടി ശുഹദാ കോളജ് ചാംപ്യന്‍മാര്‍

ഫൈസാബാദ് (പട്ടിക്കാട്): ജാമിഅ ജൂനിയര്‍ ഗ്രാന്റ് ഫെസ്റ്റില്‍ സബ്ജൂനിയര്‍, ജൂനിയര്‍ സെക്കന്‍ഡറി വിഭാഗത്തില്‍ പുത്തനങ്ങാടി ശുഹദാ ഇസ്്‌ലാമിക് കോളജ് ചാംപ്യന്മാരായി.സീനിയര്‍ വിഭാഗത്തില്‍ മാമ്പുഴ അല്‍ ഹസനാത്ത് അറബിക് കോളജ് , ജൂനിയര്‍ സെക്കന്‍ഡറി വിഭാഗത്തില്‍ ഇമാംഗസ്സാലി അക്കാദമി കൂളിവയല്‍ വയനാട് ചാംപ്യന്മാരായി.

ഇമാം ഗസ്സാലി കൂളിവയല്‍ സബ്ജൂനിയര്‍ വിഭാഗത്തിലും ദാറുല്‍ ഇഹ്‌സാന്‍ പരിയങ്ങാട് ജൂനിയര്‍ സെക്കന്‍ഡറി വിഭാഗത്തിലും സീനിയര്‍, ജൂനിയര്‍ ഹയര്‍ സെക്കന്‍ഡറി വിഭാഗങ്ങളില്‍ കുണ്ടൂര്‍ മര്‍കസും രണ്ടാം സ്ഥാനം കരസ്ഥമാക്കി. കോട്ടുമല കോംപ്ലക്‌സ് സബ്ജൂനിയര്‍ വിഭാഗത്തിലും അസീസിയ്യ ചിത്താരി ജൂനിയര്‍ സെക്കന്‍ഡറി വിഭാഗത്തിലും സീനിയര്‍, ജൂനിയര്‍ ഹയര്‍ സെക്കന്‍ഡറി വിഭാഗങ്ങളില്‍ ഇര്‍ശാദുല്‍ അനാം കൊപ്പം മൂന്നാം സ്ഥാനം കരസ്ഥമാക്കി.

സബ്ജൂനിയര്‍ വിഭാഗത്തില്‍ ശിഹാബുദ്ദീന്‍ ദാറുന്നജാത്ത് മണ്ണാര്‍ക്കാട്, ജൂനിയര്‍ സെക്കന്‍ഡറി വിഭാഗത്തില്‍ ആസിഫ് നിജാസ് ദാറുല്‍ ഇഹ്‌സാന്‍ പരിയങ്ങാട്, മുഹമ്മദ് റമീസ് അല്‍ ഹസനാത്ത് മാമ്പുഴ, ജൂനിയര്‍ ഹയര്‍ സെക്കന്‍ഡറി വിഭാഗത്തില്‍ മുഹമ്മദ് ശഫീഖ് ഇമാം ഗസ്സാലി കൂളിവയല്‍, സീനിയര്‍ വിഭാഗത്തില്‍ മുഹമ്മദ് ഹനീഫ കുണ്ടൂര്‍ മര്‍കസ് , ശമീര്‍ അഹ്മദ് തൂക്കരിപ്പൂര്‍ കലാ പ്രതിഭകളായി.
വിജയികള്‍ക്ക് പെരിന്തല്‍മണ്ണ സബ് കലക്ടര്‍ ജാഫര്‍ മാലിക് അവാര്‍ഡുകള്‍ സമ്മാനിച്ചു.പാണക്കാട് സയ്യിദ് മുഈനലി ശിഹാബ് തങ്ങള്‍ അധ്യക്ഷനായി.