ഇടുക്കി: മൂന്നാറില്‍ കാട്ടാനക്കൂട്ടം കാറുകള്‍ തകര്‍ത്തു. മാട്ടുപ്പെട്ടി ഫാക്ടറിക്ക് സമീപം വഴിയരികില്‍ നിര്‍ത്തിയിട്ടിരുന്ന കാറുകളാണ് കാട്ടാനക്കൂട്ടം തകർത്തത്. മാട്ടുപ്പെട്ടി സ്വദേശി മഹാരാജയുടെ വാഹനങ്ങളാണ് തകര്‍ത്തത്. പുലര്‍ച്ചെയാണ് സംഭവം ശ്രദ്ധയില്‍പ്പെട്ടത്. 

ഇന്നലെ രാത്രിയാണ് ആക്രമണം ഉണ്ടായതെന്നാണ് സൂചന. രാത്രിയിലും കാട്ടാനക്കൂട്ടം പ്രദേശത്തുണ്ടായിരുന്നുവെന്ന് പ്രദേശവാസികള്‍ പറഞ്ഞു. പ്രദേശത്ത് തമ്പടിച്ചിരിക്കുന്ന കാട്ടാനക്കൂട്ടത്തെ ആര്‍.ആര്‍.ടി സംഘം നിരീക്ഷിച്ച് വരികയാണ്. കാട്ടാനക്കൂട്ടത്തെ ജനവാസമേഖലയില്‍ നിന്നും ഉള്‍ക്കാട്ടിലേക്ക് തുരത്താനുള്ള ശ്രമം തുടരുകയാണ്.