കല്‍പ്പറ്റ: ജനുവരി 25 ദേശീയ സമ്മതിദായക ദിനാചരണത്തോടനുബന്ധിച്ച് ഭാവി ഇന്ത്യന്‍ വോട്ടര്‍മാരുമായി തെരഞ്ഞെടുപ്പ് ഉദ്യോഗസ്ഥര്‍ നടത്തുന്ന മുഖാമുഖത്തിന്റെ ഭാഗമായി കല്‍പ്പറ്റ കൃഷ്ണമോഹന്‍ മെമ്മോറിയല്‍ ഹയര്‍ സെക്കന്‍ഡറി സ്‌കൂളില്‍ വിദ്യാര്‍ഥികളുമായി ജില്ലാ തെരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കലക്ടര്‍ സംവദിച്ചു.
തെരഞ്ഞെടുപ്പ് പ്രക്രിയയുമായി ബന്ധപ്പെട്ട് ഭാവി വോട്ടര്‍മാര്‍ക്കുള്ള സംശയങ്ങള്‍, ആശങ്കകള്‍, ആവശ്യങ്ങള്‍, നിര്‍ദേശങ്ങള്‍ തുടങ്ങിയവ പങ്കുവെക്കാനാണ് മുഖാമുഖം സംഘടിപ്പിച്ചത്.
ജില്ലകള്‍ തോറും നിയമസഭാ മണ്ഡലങ്ങള്‍ കേന്ദ്രീകരിച്ച് ഓരോ സ്‌കൂളിലും ജില്ലാ തലത്തിലും മുഖാമുഖം സംഘടിപ്പിക്കാനാണ് ഇലക്ഷന്‍ കമ്മിഷന്‍ നിര്‍ദേശം. ഇതുപ്രകാരം കല്‍പ്പറ്റ മണ്ഡലത്തില്‍ മേപ്പാടി സെന്റ് ജോസഫ് സ്‌കൂളിലും സുല്‍ത്താന്‍ ബത്തേരിയില്‍ ജി.എച്ച്.എസ്.എസ്. മീനങ്ങാടിയിലും മാനന്തവാടിയില്‍ കാട്ടിക്കുളം ജി.എച്ച്.എസിലും തഹസില്‍ദാരുമായി വിദ്യാര്‍ഥികള്‍ മുഖാമുഖം നടത്തി.
വോട്ടിങ്ങ് പങ്കാളിത്തം കുറഞ്ഞ പ്രദേശങ്ങളില്‍ എന്‍.എസ്.എസ്എന്‍.സി.സി. വിദ്യാര്‍ഥികളെ പങ്കെടുപ്പിച്ച് ബോധവല്‍കരണം നടത്തണം, നിയമസഭയിലും ലോക് സഭയിലും വനിതാ സംവരണം ഏര്‍പ്പെടുത്തണം തുടങ്ങിയ ആവശ്യങ്ങള്‍ വിദ്യാര്‍ഥികളില്‍ നിന്നുമുയര്‍ന്നു.
ഇലക്ഷന്‍ ഡെപ്യൂട്ടി കലക്ടര്‍ സോമനാഥന്‍, പ്രിന്‍സിപ്പല്‍ സുധാറാണി, സുരേഷ് ബാബു, ജില്ലാതല മാസ്റ്റര്‍ ട്രെയിനര്‍ കെ.എം ഹാരിഷ്, തെരഞ്ഞെടുപ്പ് ഉദ്യോഗസ്ഥരായ വി.ആര്‍ ഉദയകുമാര്‍, ഷൈന്‍ ജോണ്‍, കുര്യാക്കോസ്, ബിജേഷ് പോള്‍, സന്ദീപ് തുടങ്ങിയവര്‍ സംബന്ധിച്ചു.