ന്യൂഡല്‍ഹി: അനധികൃതമായി ആയുധം കൈവശം വച്ച കേസില്‍ ബോളിവുഡ് താരം സല്‍മാന്‍ ഖാനെ വെറുതെ വിട്ടു. ജോധ്പൂര്‍ സി.ജെ.എം കോടതിയാണ് ഇന്ന് വിധി പുറപ്പെടുവിച്ചത്. സല്‍മാന്‍ഖാനെതിരേ മതിയായ തെളിവില്ലെന്ന് കോടതി പ്രസ്താവിച്ചു. കാലാവധി കഴിഞ്ഞിട്ടും ലൈസന്‍സ് പുതുക്കാതെ ആയുധം കൈവശം വച്ചെന്നായിരുന്നു കേസ്. 1998 ഒക്‌റ്റോബറിലാണ് കേസിനാസ്പദമായ സംഭവം നടന്നത്. രാജസ്ഥാനിലെ കങ്കണി ഗ്രാമത്തില്‍ സിനിമാ ഷൂട്ടിങ്ങിനിടെ സല്‍മാന്‍ ഖാനും സുഹൃത്തുക്കളും രണ്ട് കൃഷ്ണ മൃഗത്തെ വേട്ടയാടി കൊന്നിരുന്നു. സല്‍മാന്‍ ലൈസന്‍സ് കാലാവധി കഴിഞ്ഞ തോക്കുപയോഗിച്ചാണ് മൃഗങ്ങളെ വേട്ടയാടിയിരുന്നത്. ഈ കേസിലാണ് ഇന്ന് കോടതി വിധി പുറപ്പെടുവിച്ചത്. കഴിഞ്ഞ ഒന്‍പതിന് വാദം പൂര്‍ത്തിയാക്കിയ കോടതി വിധി പറയാന്‍ ഇന്നത്തേക്ക് മാറ്റുകയായിരുന്നു. വനം വകുപ്പാണ് കേസ് രജിസ്റ്റര്‍ ചെയ്തിരുന്നത്. മൃഗങ്ങളെ വേട്ടയാടികൊന്ന കേസില്‍ 2007ല്‍ സല്‍മാന്‍ ഖാന്‍ ഒരാഴ്ച ജയില്‍ വാസം അനുഭവിച്ചിരുന്നു. ശേഷം ജാമ്യത്തിലിറങ്ങുകയായിരുന്നു. കൃഷ്ണ മൃഗത്തെ കൊന്ന കേസ് ഇപ്പോള്‍ സുപ്രിം കോടതിയുടെ പരിഗണനയിലാണ്.