തിരുവനന്തപുരം: സെലിബ്രിറ്റികള്‍ക്കും കോര്‍പ്പറേറ്റ് അധിപന്‍മാര്‍ക്കും അനുകരിക്കാവുന്ന ലാളിത്യത്തിന്റെ നല്ല മാതൃകയാണ് മുഖ്യമന്ത്രി പിണറായി വിജയനെന്ന് തെന്നിന്ത്യന്‍ സൂപ്പര്‍താരം സൂര്യ. തിരുവനന്തപുരത്ത് നടത്തിയ വാര്‍ത്താസമ്മേളനത്തിലാണ് പിണറായിയെ കുറിച്ചുള്ള വ്യത്യസ്തമായ നിരീക്ഷണം സൂര്യ പങ്കുവച്ചത്. വിമാനത്തില്‍ അദ്ദേഹവുമൊത്ത് യാത്ര ചെയ്തപ്പോഴുണ്ടായ അനുഭവവും അദ്ദേഹം വിശദീകരിച്ചു.
എക്കോണമി ക്ലാസില്‍ യാത്ര ചെയ്യാറുള്ള അദ്ദേഹം ബാഗ് സ്വയം എടുക്കുന്നതും തിരക്കും ആഡംബരത്വവും കാട്ടി സഹയാത്രക്കാരെ ബുദ്ധിമുട്ടിക്കാത്ത രീതിയും ആദരവുണ്ടാക്കിയെന്ന് സൂര്യ പറഞ്ഞു. ബിസിനസ് ക്ലാസിലുള്ള യാത്രക്കാര്‍ ഇറങ്ങിത്തീരുന്നത് വരെ ക്ഷമയോടെ അദ്ദേഹം കാത്തു നിന്നു. മുഖ്യമന്ത്രിക്ക് സ്വന്തം പദവി പരിഗണിച്ച് നേരത്തെ ഇറങ്ങാമായിരുന്നു. അത്തരം പ്രകടനങ്ങളിലൊന്നും അദ്ദേഹത്തിന് താല്‍പര്യമുണ്ടെന്ന് തോന്നിയില്ല. ഒരു ഹൈസ്‌കൂള്‍ ഹെഡ്മാസ്റ്ററുടേതുപോലെ ലളിതമായ വേഷവും പക്വതയാര്‍ന്ന പെരുമാറ്റവും മറ്റു മുഖ്യമന്ത്രിമാരില്‍ കാണാത്തതാണെന്നും സൂര്യ കൂട്ടിച്ചേര്‍ത്തു.