ചാലിയം: സംസ്ഥാന സ്‌കൂള്‍ കലോത്സവത്തില്‍ അറബിക് പ്രസംഗ മത്സരത്തില്‍ പി.വി മുഹമ്മദ് നിഹാദിനു എ ഗ്രേഡോടെ ഒന്നാം സ്ഥാനം. ചാലിയം ഉമ്പിച്ചി ഹാജി ഹയര്‍ സെക്കന്‍ഡറി സ്‌കൂള്‍ പ്ലസ് ടു വിദ്യാര്‍ഥിയാണ് നിഹാദ്. ആവിഷ്‌കാര സ്വാതന്ത്ര്യവും മനുഷ്യാവകാശങ്ങളും എന്ന വിഷത്തില്‍ അഭയാര്‍ഥികളായ മ്യാന്‍മറിലെ റോഹിംഗ്യന്‍ മുസ്‌ലിംകള്‍, യുദ്ധക്കെടുതികളനുഭവിക്കുന്ന സിറിയന്‍ ജനത, രോഹിത് വെമുല, ജെ.എന്‍.യുവില്‍ കാണാതായ നജീബ് എന്നീ സംഭവങ്ങള്‍ പരാമര്‍ശിച്ചാണ് നിഹാദ് എ ഗ്രേഡോടെ ഒന്നാം സ്ഥാനം നേടിയത്.
നേരത്തെ കോഴിക്കോട് ജില്ലാ കലോത്സവത്തില്‍ ഇംഗ്ലീഷ് പ്രസംഗ മത്സരത്തില്‍ എ ഗ്രേഡ് നേടിയിരുന്നു. കേരള അറബിക് ടീച്ചേഴ്‌സ് ഫെഡറേഷന്‍ സംഘടിപ്പിച്ച സംസ്ഥാന തല അറബിക് ക്വിസ് മത്സരത്തിലും ഒന്നാമതായിരുന്നു.
ന്യൂഡല്‍ഹിയിലെ ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് മാസ് കമ്മ്യൂനിക്കേഷനില്‍ കഴിഞ്ഞ വര്‍ഷം സംഘടിപ്പിച്ച മാധ്യമ ശില്‍പശാലയില്‍ മുഹമ്മദ് നിഹാദ് സ്‌കൂളിനെ പ്രതിനിധീകരിച്ച് പങ്കെടുത്തിരുന്നു. പ്ലസ് ടുവിനു ശേഷം നാഷനല്‍ യൂനിവേഴ്‌സിറ്റിയില്‍ ഇസ്‌ലാമിക് സ്റ്റഡീസില്‍ ഉപരിപഠനം ആഗ്രഹിക്കുന്ന നിഹാദ് തലശ്ശേരി പുത്തന്‍വീട്ടില്‍ ടി.കെ നിസാര്‍-മുംതാസ് ദമ്പതികളുടെ മകനാണ്. ഇപ്പോള്‍ കോഴിക്കോട് പന്നിയങ്കരയിലാണ് താമസം.