തൃശൂര്‍: ജൈവകൃഷിയും വിപണനവും പ്രോത്സാഹിപ്പിക്കുാന്‍ ലക്ഷ്യമിട്ടുള്ള ബാങ്ക് പ്രവര്‍ത്തനങ്ങള്‍ക്ക് തുടക്കമിടാന്‍ അബാര്‍ഡ് സെന്റര്‍ തീരുമാനിച്ചതായി ബന്ധപ്പെട്ടവര്‍ വാര്‍ത്താ സമ്മേളനത്തില്‍ അറിയിച്ചു. ഇതിനായി അബാര്‍ഡ് നിഷ് മാര്‍ക്കറ്റിങ് ശൃംഖല രൂപവല്‍ക്കരിക്കും. വിത്ത് തൊട്ട് വിപണി വരെയുള്ള കാര്യങ്ങള്‍ സാമ്പത്തികാസൂത്രണത്തോടെ കൂട്ടിയിണക്കി ഓരോ ജൈവ കൃഷിയിടവും ലാഭകരമാക്കുകയും വിഭവങ്ങള്‍ പ്രാദേശിക തലത്തില്‍ ന്യായവിലക്ക് ലഭ്യമാക്കുകയും ചെയ്യും.
ജൂണ്‍ പത്ത് മുതല്‍ തൃശൂര്‍ കോര്‍പറേഷനിലെയും പാണഞ്ചേരി, മാടക്കത്തറ, നടത്തറ, പുത്തൂര്‍ പഞ്ചായത്തുകളിലെയും റസിഡന്‍സ് അസോസിയേഷനുകള്‍ വഴി നിഷ് മാര്‍ക്കറ്റിന്റെ പ്രാഥമിക ശൃംഖല വിപുലപ്പെടുത്തും.
തൃശൂര്‍, എറണാകുളം, പാലക്കാട് ജില്ലകളിലേക്കുള്ള വ്യാപനത്തിന് ജൂണ്‍ 15 നും 300 ജൈവ കര്‍ഷകരെ ഉള്‍പ്പെടുത്തി സംസ്ഥാനതല മാതൃകയ്ക്ക് 30നും തുടക്കം കുറിക്കും. മാര്‍ക്കറ്റിനെയോ ഇടനിലക്കാരെയോ ആശ്രയിക്കാതെ ഓണ്‍ലൈന്‍, നേരിട്ടുള്ള വിപണനം, ബാര്‍ട്ടര്‍ സമ്പ്രദായം എന്നിവയിലൂടെ ജൈവ കാര്‍ഷിക ഉത്പന്നങ്ങള്‍ ഉപഭോക്താക്കള്‍ക്ക് എത്തിക്കാനാണ് ഉദ്ദേശിക്കുന്നത്.
ജൈവകൃഷിക്കുള്ള എല്ലാ പ്രോത്സാഹനവും ബേങ്ക് നല്‍കും. മൂന്ന് സെന്റ് സ്ഥലമുള്ളവര്‍ക്ക് പോലും സഹായം ലഭ്യമാകും. അഞ്ച് സെന്റില്‍ വീട് വച്ചവര്‍ക്ക് വീടിന്റെ ടെറസില്‍ കൃഷി ചെയ്യാനും ബേങ്ക് പദ്ധതി വഴി കഴിയും.
കാര്‍ഷിക ജോലികള്‍ക്ക് ആളുകളെയും എത്തിച്ചു നല്‍കും. പദ്ധതിയില്‍ താത്പര്യമുള്ള റസിഡന്‍സ് അസോസിയേഷനുകളും ജൈവ കര്‍ഷക കൂട്ടായ്മകളും ജൂണ്‍ പത്തിന് മുമ്പ് തൃശൂര്‍ ശക്തന്‍ നഗറിലുള്ള അബാര്‍ഡ് സെന്ററില്‍ പേര് വിവരങ്ങള്‍ രജിസ്റ്റര്‍ ചെയ്യണം. വാര്‍ത്താ സമ്മേളനത്തില്‍ കെ ജോര്‍ജ്ജ്, ഹരി ഗോപിനാഥ്, വി.കെ സജീവന്‍, കെ.രാധാകൃഷ്ണന്‍, പ്രിയാമണി എന്നിവര്‍ പങ്കെടുത്തു.