കോഴിക്കോട്: പ്രശസ്ത നാടക സിനിമാപ്രവര്‍ത്തകനായിരുന്ന നിലമ്പൂര്‍ ബാലന്റെ സ്മരണാര്‍ഥം അനുസ്മരണ യോഗവും പുരസ്‌കാര ദാനവും സംഘടിപ്പിച്ചു.
കോഴിക്കോട് ടൗണ്‍ഹാളില്‍ സംഘടിപ്പിച്ച ചടങ്ങ് നടന്‍ മാമുക്കോയ ഉദ്ഘാടനം ചെയ്തു. സംശുദ്ധമായ വ്യക്തിത്വത്തിനുടമയായിരുന്നു നിലമ്പൂര്‍ ബാലനെന്ന് അദ്ദേഹം അനുസ്മരിച്ചു. ഔദ്യോഗിക തിരക്കുകള്‍ക്കിടയിലും തന്റെ സൗഹൃദവലയങ്ങള്‍ക്ക് നിലമ്പൂര്‍ ബാലന്‍ നല്‍കിയ പ്രാധാന്യം മാതൃകാപരമെന്നും മാമുക്കോയ കൂട്ടിച്ചേര്‍ത്തു. നിലമ്പൂര്‍ ബാലന്‍ അനുസ്മരണ സമിതി ഏര്‍പ്പെടുത്തിയ പുരസ്‌കാരം രാധാകൃഷ്ണന് മാമുക്കോയ സമ്മാനിച്ചു. ചിത്രകാരന്‍ പോള്‍ കല്ലാനോട് അധ്യക്ഷനായി. പുരസ്‌കാര ജേതാവിനെ നവീന്‍ പരിചയപ്പെടുത്തി. ഫ്രാന്‍സിസ് കോടങ്കണ്ടത്ത്, നിലമ്പൂര്‍ ആയിഷ, എ. ശാന്തകുമാര്‍, മധു മാസ്റ്റര്‍ പ്രസംഗിച്ചു. തുടര്‍ന്ന് ഗിരീഷ് പിസി പാലം സംവിധാനം ചെയ്ത കുട്ടികളുടെ നാടകം അരങ്ങേറി.