കാബൂള്‍: അഫ്ഗാനിസ്ഥാനില്‍ ഏതാനും ദിവസമായി തുടരുന്ന കനത്ത മഞ്ഞുവീഴ്ചയെ തുടര്‍ന്ന് മരണസംഖ്യ 135 ആയതായി റിപ്പോര്‍ട്ട്. ഹിമപാളികള്‍ വീണ് നിരവധി വീടുകള്‍ തകര്‍ന്നു. ഹെലികോപ്ടര്‍ ഉപയോഗിച്ചാണ് രക്ഷാപ്രവര്‍ത്തനം നടക്കുന്നത്. ഒരു ഗ്രാമത്തില്‍ മാത്രം 53 പേര്‍ മരിച്ചു. രക്ഷാപ്രവര്‍ത്തനങ്ങളുടെ ഏകോപന ചുമതലയുള്ള അഫ്ഗാന്‍ മന്ത്രാലയ വക്താവ് ഉമര്‍ മുഹമ്മദാണ് ഇക്കാര്യം അറിയിച്ചത്.
നുരിസ്താനിലെ ഗ്രാമത്തിലാണ് വന്‍ ഹിമപാതമുണ്ടായത്. മൂന്നു മീറ്റര്‍ കനത്തില്‍ മഞ്ഞുവീഴ്ചയുണ്ടായി. ഇതുമൂലം റോഡുകളെല്ലാം അടഞ്ഞു. റോഡുകള്‍ അടഞ്ഞതോടെ ഹെലികോപ്ടറുകളെയാണ് രക്ഷാപ്രവര്‍ത്തനത്തിന് ഉപയോഗിക്കുന്നത്. തലസ്ഥാനമായ കാബൂളിലും കനത്ത മഞ്ഞുവീഴ്ചയാണ്. 150 ലേറെ വീടുകള്‍ തകരുകയും 600 ലേറെ മൃഗങ്ങള്‍ക്ക് ജീവഹാനിയുണ്ടാകുകയും ചെയ്തു. വരും ദിവസങ്ങളില്‍ മരണ നിരക്ക് ഇനിയും ഉയര്‍ന്നേക്കാമെന്ന് പ്രവിശ്യാ ഗവര്‍ണര്‍ പറഞ്ഞു.