കോട്ടയം: ചരിത്രാന്വേഷകര്‍ക്കും വിശ്വാസികള്‍ക്കും പുത്തനുണര്‍വ് നല്‍കി കുര്യാക്കോസ് ഏലിയാസ് ചാവറ അര്‍ക്കൈവിന്റെയും ഗവേഷണ കേന്ദ്രത്തിന്റെയും ഉദ്ഘാടനം വ്യാഴാഴ്ച്ച നടക്കും.
ചരിത്ര നിക്ഷേങ്ങളുടെ കലവറയെന്ന് വിശേഷിപ്പിക്കാവുന്ന മാന്നാനം ചരിത്ര ഗ്രന്ഥശാലയിലേക്കെത്തിയാല്‍ എഴുത്തോലകള്‍ മുതല്‍ ഡിജിറ്റല്‍ പുസ്തകങ്ങള്‍ വരെ വീക്ഷിക്കാം.
സാങ്കേതിക വിദ്യ അരങ്ങു പിടിച്ചടക്കുന്നതിന് മുന്‍പേ കത്തുന്ന വിളക്കിന്റെ വെട്ടത്തില്‍ ഓലത്താളുകളില്‍ കുറിച്ചിട്ട ചരിത്ര രേഖകളും പ്രാര്‍ഥനാ ഗ്രന്ഥങ്ങളുമാണ് ഇവിടുത്തെ ഏറ്റവും ഫഴക്കം ചെന്ന ശേഖരം. കൈയെഴുത്ത് പ്രതികള്‍,അച്ചടി പുസ്തകങ്ങള്‍, കത്തുകള്‍, നാളാഗമങ്ങള്‍ തുടങ്ങി അമൂല്യ നിധികളുടെ സമാഹരമാണ് മാന്നാനം അര്‍ക്കൈവ്.
ചരിത്ര പഠനക്കാര്‍ക്ക് സഹായകരമായ ഗ്രന്ഥശാലയുടെ ഉദ്ഘാടനം വ്യാഴാഴ്ച്ച ഉച്ചയ്ക്ക് കേരള ഗവര്‍ണര്‍ പി സദാശിവം നിര്‍വഹിക്കും.കേരള സുറിയാനി കത്തോലിക്കാ സഭയ്ക്കും സമൂഹത്തിനും ചരിത്ര പ്രാധാന്യമര്‍ഹിക്കുന്ന നിരവധി രേഖകള്‍ ഇവിടെയെത്തിയാല്‍ കാണാന്‍ കഴിയും.
മാര്‍ ജോസഫ് കരിയാറ്റില്‍ തിരുമേനിയുടെ ഡിപ്ലോമ സാക്ഷ്യപത്രം, മാന്നാനം കൊവേന്തയുടെ ആദ്യകാല പുസ്തകങ്ങള്‍, ചാവറയച്ചന്‍ എഴുതിയ നാളാഗമങ്ങള്‍, ഉദയംപേരൂര്‍ സൂനഹദോസിന്റെ കാനോനങ്ങള്‍,സീറോ മലബാര്‍ സഭയുടെ വളര്‍ച്ചയുടെ ആദ്യപടവുകള്‍ വരച്ചുകാണിക്കുന്ന ആലഞ്ചേരി ബര്‍ണാഡ് സി.എം.ഐ അച്ചന്റെ ഡയറിക്കുറിപ്പുകള്‍, കൈയെഴുത്ത് പ്രതികള്‍ തുടങ്ങിയവയും ചരിത്ര ഗ്രന്ഥശാലയുടെ പ്രധാന ആകര്‍ഷണങ്ങളാണ്.
സുറിയാനി, മലയാളം,ഇംഗ്ലീഷ്, ലാറ്റിന്‍, ജര്‍മന്‍, ഗ്രീക്ക്, പോര്‍ച്ചുഗീസ്, സ്പാനിഷ്, ഭാഷകളില്‍ എഴുതിയ കൈയെഴുത്ത് പ്രതികളും പുസ്തകങ്ങളുമടക്കം പതിനായിരത്തിലധികം അമൂല്യ രേഖകളും ഇവിടെയുണ്ട്.