വിഴിഞ്ഞം: ദിവസങ്ങളുടെ വ്യത്യാസത്തില്‍ വിഴിഞ്ഞത്ത് വീണ്ടും അപകടം. ചെരുപ്പെടുക്കാന്‍ വെള്ളത്തിലിറങ്ങിയ  ഓട്ടോ ഡ്രൈവറെ  തിരയില്‍പ്പെട്ട് കാണാതായി.
വഴയില, കരകുളം, പരവൂര്‍ക്കോണത്ത് ബാബുവിന്റെ മകന്‍ ഷൈജു(26)നെയാണ് കാണാതായത്. ഇന്നലെ വൈകിട്ട് 3.30 ഓടെ വിഴിഞ്ഞം പഴയവാര്‍ഫിന് സമീപത്തെ വലിയകടപ്പുറത്തായിരുന്നു അപകടം. കരകുളം സ്വദേശികളായ കണ്ണന്‍,സുനില്‍കുമാര്‍,
ആര്യനാട് പാലേയ്‌ക്കോണം സ്വദേശി രാജന്‍ എന്നി സുഹൃത്തുക്കള്‍ക്കൊപ്പമാണ് ഷൈജു വിഴിഞ്ഞം കടല്‍ തീരത്ത് എത്തിയത്.
തീരത്ത് നില്‍ക്കുമ്പോള്‍ തിരയില്‍പെട്ട ചെരുപ്പ് തിരിച്ചെടുക്കാന്‍ ശ്രമിക്കുന്നതിനിടെ ഷൈജു  തിരയടിയില്‍പെടുകയായിരുന്നു. തീരദേശ പൊലിസിന്റെയും മറൈന്‍ എന്‍ഫോഴ്‌സ്‌മെന്റിന്റേയും ബോട്ടുകള്‍ തിരച്ചില്‍ നടത്തിയെങ്കിലും കണ്ടെത്താന്‍ കഴിഞ്ഞില്ല. അതേസമയം വെള്ളിയാഴ്ച  രാത്രി വിഴിഞ്ഞം ബൊള്ളാഡ് പരിശോധനാ കേന്ദ്രത്തിന് സമീപത്തു കടലില്‍ വീണു കാണാതായ തൊടുപുഴ സ്വദേശിയായ സനൂപ്(22)ന്റെ മൃതദേഹം കണ്ടെത്തി. ഇന്നലെ രാവിലെ ഏഴു മണിയോടെ സംഭവസ്ഥലത്ത് നിന്ന് മുന്നൂറു മീറ്റര്‍ അകലെയാണ് മൃതദേഹം കണ്ടെത്തിയത്. പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് കൈമാറിയ മൃതദേഹം ഇന്ന് വൈകിട്ട് നാട്ടില്‍ സംസ്‌കരിക്കും.