ചെറുവത്തൂര്‍: പായമെടയലും കുട്ടനെയ്ത്തും പാളത്തൊപ്പി നിര്‍മാണവും ഉള്‍പ്പെടെ പരമ്പരാഗത അറിവുകളുടെ മേളനവുമായി തൊഴിലറിവു പാഠശാല. സര്‍വശിക്ഷാ അഭിയാന്‍ ചെറുവത്തൂര്‍ ബി.ആര്‍.സിയുടെ നേതൃത്വത്തില്‍ കൂളിയാട് ഗവ. യു.പി സ്‌കൂളിലാണു പാഠശാല സംഘടിപ്പിച്ചത്.
കൈതയും ഈറ്റയും വിദൂര ദേശങ്ങളില്‍ പോയി ശേഖരിച്ച് നാടിന്റെ പഴയ തൊഴില്‍ പാരമ്പര്യത്തെ നിലനിര്‍ത്താന്‍ പാടുപെടുന്ന പഴമക്കാരുടെ അനുഭവ വിവരണ വേദികൂടിയായി ഈ തൊഴിലറിവു പാഠശാല. കൃഷ്ണന്‍ പാം പെരിങ്ങാര, ജാനകി ചാനടുക്കം, ഷീബ എടക്കാനം, അമ്പൂഞ്ഞി, സി നാരായണന്‍ എന്നിവരാണ് തൊഴിലറിവുകള്‍ പകരാനെത്തിയത്. അന്യം നിന്നുപോകുന്ന പരമ്പരാഗത തൊഴിലറിവുകള്‍ തിരികെപ്പിടിക്കുന്നതിനും അവയുടെ സ്ഥാനം വളരെ ഉയര്‍ന്നതാണെന്ന് ബോധ്യപ്പെടുത്താനും ഇത്തരം തൊഴിലുകളുടെ മാഹാത്മ്യം ഊട്ടിയുറപ്പിക്കുന്നതിനുമാണ് പാഠശാല ഒരുക്കിയത്.
നാട്ടുപയമ, ഡോക്യുമെന്ററി പ്രദര്‍ശനം, തൊഴില്‍ശാല സന്ദര്‍ശനം, ഓലമെടയല്‍ പരിശീലനം എന്നിവയും നടന്നു. പാഠശാല കയ്യൂര്‍ ചീമേനി പഞ്ചായത്ത് പ്രസിഡന്റ് കെ ശകുന്തള ഉദ്ഘാടനം ചെയ്തു. പി.ടി.എ പ്രസിഡന്റ് കെ കരുണാകരന്‍ അധ്യക്ഷനായി. വികസന സ്റ്റാന്റിങ് കമ്മിറ്റി അധ്യക്ഷന്‍ എം.വി ഗീത കൈത്തൊഴില്‍ വിദഗ്ധരെ ആദരിച്ചു. കെ മുരളി, മനോജ് മാത്യു, പി.വി ഉണ്ണിരാജന്‍, പി വേണുഗോപാലന്‍, പി.കെ സരോജിനി, പി സ്‌നേഹലത, എം.എസ് ഇന്ദുലേഖ, എ സുഹ്‌റാബി, ടി.എം മുംതാസ്, കെ ചന്ദ്രന്‍, കെ.വി ലളിത, എം.വി വിജയന്‍ സംസാരിച്ചു.