കൊല്‍ക്കത്ത: അതിര്‍ത്തിയില്‍ കള്ളനോട്ട് വ്യാപകമായ സാഹചര്യത്തില്‍ ആര്‍.ബി.ഐ, ബി.എസ്.എഫ് ജവാന്മാര്‍ക്ക് കള്ളനോട്ട് കണ്ടുപിടിക്കുന്നതിനുള്ള പരിശീലനം നല്‍കിയേക്കും. അധികൃതരുമായി ഇക്കാര്യം ബി.എസ്.എഫ് ചര്‍ച്ച ചെയ്തു വരികയാണ്.

ഇന്ത്യ- ബംഗ്ലാദേശ് അതിര്‍ത്തിയില്‍ കഴിഞ്ഞ ഒരു മാസമായി ധാരാളം കള്ളപ്പണ വേട്ടകളാണ് നടന്നിട്ടുള്ളത്. പുതിയ രണ്ടായിരം രൂപയുടെ കള്ളനോട്ടുകളാണ് അതിര്‍ത്തിയില്‍ വ്യാപകമായിട്ടുള്ളത്. നിരവധി സുരക്ഷാ പ്രത്യേകതകളുണ്ടെങ്കിലും ഇതിന്റെ പകുതിയിലധികം സവിശേഷതകള്‍ കാണപ്പെടുന്ന വ്യാജനോട്ടുകളാണ് പിടിച്ചെടുത്തവയില്‍ അധികവും. അതിനാല്‍ തന്നെ ഇത്തരം നോട്ടുകള്‍ തിരിച്ചറിയാന്‍ നല്ല പരിശീലനം അത്യാവശ്യമാണ്. അതുകൊണ്ടാണ് തങ്ങള്‍ ഇതിനായി ആര്‍.ബി.ഐയെ തന്നെ ബന്ധപ്പെട്ടതെന്ന് ഒരു മുതിര്‍ന്ന ബി.എസ്.എഫ് ഉദ്യോഗസ്ഥന്‍ പറഞ്ഞു.