കോഴിക്കോട്: തനിക്കെതിരായ അന്വേഷണം ആവശ്യപ്പെട്ട പുതിയ ഹരജിയില്‍ എന്‍.സി.പിയില്‍ നിന്നുള്ള ആര്‍ക്കെങ്കിലും പങ്കുണ്ടെന്ന് കരുതുന്നില്ലെന്ന് എ.കെ ശശീന്ദ്രന്‍. മാധ്യമങ്ങളില്‍ നിന്നുള്ള വിവരമേ ഇക്കാര്യത്തില്‍ തനിക്കും ഉള്ളൂ എന്നും അദ്ദേഹം പറഞ്ഞു. ഈ വിവരം നേരിട്ടു ബോധ്യമാകാതെ അന്വേഷണം ആവശ്യപ്പെടില്ലെന്നു അദ്ദേഹം കൂട്ടിച്ചേര്‍ത്തു. തോമസ് ചാണ്ടിക്ക് പങ്കുണ്ടെന്ന വാര്‍ത്തകളിലാണ് ശശീന്ദ്രന്റെ പ്രതികരണം.   

ഹരജി സംബന്ധിച്ച് പാര്‍ട്ടിയില്‍ അന്വേഷണം ആവശ്യപ്പെടില്ല.  അന്വേഷണം ആവശ്യപ്പെടണമെങ്കില്‍ അതിന് വേണ്ട തെളിവുകള്‍ തന്റെ കൈവശമുണ്ടാവണമെന്നും ശശീന്ദ്രന്‍ വ്യക്തമാക്കി.

നേരത്തെ എ.കെ.ശശീന്ദ്രനെ ഫോണ്‍കെണി കേസില്‍ നിന്ന് ഒഴിവാക്കിയ കോടതി വിധിക്കെതിരെ ഹൈകോടതിയില്‍ മഹാലക്ഷ്മി സ്വകാര്യ ഹരജി സമര്‍പ്പിച്ചിരുന്നു. തോമസ് ചാണ്ടിയുടെ പി.എയുടെ വീട്ടുജോലിക്കാരിയാണ് ഹരജി നല്‍കിയതെന്ന വാര്‍ത്തകള്‍ ഇന്നലെ പുറത്ത് വന്നിരുന്നു.