കൊച്ചി: നടി ആക്രമിക്കപ്പെട്ട കേസില്‍ സിസിടിവി ദൃശ്യങ്ങള്‍ ഉള്‍പെടെയുള്ള തെളിവുകള്‍ പൊലിസ് ദിലീപിന് കൈമാറി. നടിയുമായി വാഹനം കടന്നുപോയ വഴിയിലെ ആറ് സിസിടിവി ദൃശ്യങ്ങളും രണ്ട് പ്രതികളുടെ മൊബൈല്‍ ഫോണുകളുടെ ഫോറന്‍സിക് പരിശോധനാ റിപ്പോര്‍ട്ട്, ഓഡിയോ ക്ലിപ്പുകള്‍ എന്നിവയാണ് കൈമാറിയത്.  കേസിലെ മുഖ്യപ്രതി സുനില്‍കുമാര്‍ അന്വേഷണ ഉദ്യോഗസ്ഥന് മുന്നില്‍ കുറ്റസമ്മതം നടത്തുന്നതിന്റെ ശബ്ദരേഖയും കൈമാറിയിട്ടുണ്ട്. കോടതി നിര്‍ദേശ പ്രകാരമാണ് തെളിവുകള്‍ പ്രതിഭാഗത്തിന് കൈമാറിയത്.


അതേസമയം, നടിയെ അക്രമിച്ചതുമായി ബന്ധപ്പെട്ട ദൃശ്യങ്ങളുടെ പകര്‍പ്പ്  നല്‍കണമെന്നാവശ്യപ്പെട്ട് ദിലീപ് നല്‍കിയ ഹരജി കോടതി ഈ മാസം ഏഴിന് പരിഗണിക്കും.
ദൃശ്യങ്ങള്‍ നല്‍കാനാവില്ലെന്ന് കോടതി നേരത്തെ വ്യക്തമാക്കിയിരുന്നു. പൊലിസ് എതിര്‍ത്തതിനെ തുടര്‍ന്നായിരുന്നു ഈ നിലപാട്. തുടര്‍ന്നാണ് ദിലീപ് വീണ്ടും ഹരജി നല്‍കിയത്.  


നടി നല്‍കിയ മൊഴി അനുസരിച്ചുള്ള ദൃശ്യങ്ങളല്ല വീഡിയോയില്‍ ഉള്ളതെന്നും ഓടുന്ന വണ്ടിയില്‍ വെച്ചല്ല പീഡനം നടന്നിരിക്കുന്നതെന്നും മൊഴിയും ദൃശ്യങ്ങളും തമ്മില്‍ പൊരുത്തക്കേടുണ്ടെന്നും ചൂണ്ടിക്കാണിച്ചാണ് ദിലീപ് രണ്ടാമതും ഹര്‍ജി നല്‍കിയിരിക്കുന്നത്.  

ദൃശ്യങ്ങള്‍ കൈമാറിയാല്‍ ദുരുപയോഗം ചെയ്യപ്പെടാമെന്നും നടിയെയും തുടര്‍ന്നുള്ള കേസിന്റെ പുരോഗതിയെയും അത് ബാധിക്കുമെന്നാണ് പൊലിസിന്റെ വാദം.