ന്യൂഡല്‍ഹി: റിപബ്ലിക് ദിനത്തില്‍ കസ്ഗഞ്ചിലുണ്ടായ കലാപത്തെച്ചൊല്ലി തുടര്‍ച്ചയായ രണ്ടാം ദിവസവും രാജ്യസഭ തടസപ്പെട്ടു. ശൂന്യവേള ആരംഭിച്ച ഉടനെ സമാജ് വാദി പാര്‍ട്ടി അംഗങ്ങളാണ് വിഷയം ഉന്നയിച്ചത്.
ഇത് ചര്‍ച്ച ചെയ്യാന്‍ തയാറാകാതെ ശൂന്യവേളാ നടപടികളുമായി അധ്യക്ഷന്‍ വെങ്കയ്യ നായിഡു മുന്നോട്ടു പോയതോടെ, അംഗങ്ങള്‍ നടുത്തളത്തിലിറങ്ങി മുദ്രാവാക്യം വിളിച്ചു. വെള്ളിയാഴ്ചയും കസ്ഗഞ്ച് വിഷയത്തില്‍ രാജ്യസഭ രണ്ടു തവണ നിര്‍ത്തിവച്ചിരുന്നു.
അതേസമയം രാജ്യസഭയിലെ കന്നി പ്രസംഗത്തില്‍ ബി.ജെ.പി അധ്യക്ഷന്‍ അമിത്ഷാ കോണ്‍ഗ്രസിനെതിരേ രൂക്ഷമായ ആരോപണമാണ് ഉന്നയിച്ചത്. 55 വര്‍ഷം ഭരിച്ച കോണ്‍ഗ്രസിന് എന്തു കൊണ്ട് തൊഴിലില്ലായ്മ ഇല്ലാതാക്കാനായില്ലെന്ന് അമിത്ഷാ ചോദിച്ചു. ഇതിനെതിരേ ശക്തമായ മറുപടിയാണ് പ്രതിപക്ഷ നേതാവ് ഗുലാം നബി ആസാദ് നല്‍കിയത്.