ഹൈദരാബാദ്: ഇംഗ്ലീഷ് ആന്റ് ഫോറിന്‍ ലാംഗ്വേജ് യൂനിവേഴ്‌സിറ്റിയില്‍ (ഇഫ്‌ലു) മലയാളി വിദ്യാര്‍ഥിക്ക് പി.എച്ച്.ഡി പ്രവേശന പരീക്ഷയുടെ ഹാള്‍ടിക്കറ്റ് നിഷേധിച്ചു. മലപ്പുറം സ്വദേശിയായ അബ്ദുല്‍ ജബ്ബാര്‍ സി എന്ന വിദ്യാര്‍ഥിയുടെ ഹാള്‍ടിക്കറ്റാണ് കാരണമൊന്നും കൂടാതെ നിഷേധിച്ചത്.

ഇഫ്‌ലുവില്‍ നിന്നു തന്നെ ജേണലിസത്തില്‍ പി.ജി പൂര്‍ത്തിയാക്കിയ ജബ്ബാര്‍, കള്‍ച്ചറല്‍ സ്റ്റഡീസ്, കംപാരിറ്റീവ് ലിറ്ററേച്ചര്‍ എന്നീ വിഷയങ്ങളിലാണ് ഗവേഷണത്തിന് അപേക്ഷിച്ചിരുന്നത്. നിശ്ചിത സമയത്ത് ഹാള്‍ ടിക്കറ്റ് ഡൗണ്‍ലോഡ് ചെയ്യാനാവാതെ വന്നതോടെ എക്‌സാം കണ്‍ട്രോളറെ ബന്ധപ്പെട്ടു.

എന്നാല്‍ ഹാള്‍ടിക്കറ്റ് നല്‍കേണ്ടെന്ന് യൂനിവേഴ്‌സിറ്റി പ്രോക്ടര്‍ പ്രകാശ് കോനയുടെ നിര്‍ദേശമുണ്ടെന്നായിരുന്നു പരീക്ഷാ കണ്‍ട്രോളറെ സമീപിച്ചപ്പോള്‍ ലഭിച്ച വിശദീകരണം.

ശനിയാഴ്ചയാണ് പ്രവേശന പരീക്ഷ. ജബ്ബാറിനെക്കൂടെ മറ്റൊരു വിദ്യാര്‍ഥിയുടെയും ഹാള്‍ടിക്കറ്റ് തടഞ്ഞുവച്ചിട്ടുണ്ട്. രാഷ്ട്രീയത്തില്‍ ഇടപെട്ടുവെന്ന കാരണമായിരിക്കാം ഹാള്‍ടിക്കറ്റ് തടഞ്ഞുവച്ചതെന്നാണ് കരുതുന്നത്. രോഹിത് വെമുല വിഷയത്തില്‍ പ്രക്ഷോഭത്തിനിറങ്ങിയ കൂട്ടത്തില്‍ ജബ്ബാറും ഉണ്ടായിരുന്നു.