തിരുവനന്തപുരം: സംസ്ഥാന വനിതാ ശിശുവികസന വകുപ്പിന്റെ ആഭിമുഖ്യത്തിലുള്ള ശരണബാല്യം പദ്ധതിയെ അഭിനന്ദിച്ച് നോബല്‍ സമ്മാന ജേതാവായ കൈലാസ് സത്യാര്‍ത്ഥി നേതൃത്വം നല്‍കുന്ന ബച്ച്പന്‍ ബച്ചാവോ ആന്ദോളന്‍. കേരളത്തിലെ ശരണബാല്യം ടീം ഡല്‍ഹിയില്‍ നടത്തിയ പ്രവര്‍ത്തനങ്ങളെ അഭിനന്ദിച്ചുകൊണ്ട് ബച്ച്പന്‍ ബച്ചാവോ ആന്ദോളന്‍ സംസ്ഥാന കോഓര്‍ഡിനേറ്റര്‍ പ്രസ്രീന്‍ കുന്നമ്പള്ളി ആരോഗ്യ സാമൂഹ്യനീതി വകുപ്പ് മന്ത്രി കെ.കെ. ശൈലജ ടീച്ചറെ സന്ദര്‍ശിച്ച് സ്‌നേഹോപഹാരം നല്‍കി.
സര്‍ക്കാര്‍ സംവിധാനത്തിന് കീഴില്‍ ബാലവേല, ബാല ഭിക്ഷാടനം തടയുന്നതിനായി ചൈല്‍ഡ് റെസ്‌ക്യൂ ഓഫിസര്‍മാരെ നിയമിച്ച ആദ്യ സംസ്ഥാനമെന്ന നിലയില്‍ കൈലാസ് സത്യാര്‍ത്ഥിയുടെ അഭിനന്ദനം മന്ത്രിയെ അറിയിച്ചു. കുട്ടികളുടെ ക്ഷേമത്തിനായി കേരളവുമായി സഹകരിക്കാന്‍ താത്പര്യമുണ്ടെന്നും അദ്ദേഹം പറഞ്ഞു.
ശരണബാല്യം പദ്ധതി കാര്യക്ഷമമായി നടപ്പിലാക്കുന്നതിന് മുന്‍കൈയെടുത്ത സാമൂഹ്യനീതി വകുപ്പ് സ്‌പെഷ്യല്‍ സെക്രട്ടറി ബിജു പ്രഭാകര്‍ , വനിതാ ശിശുവികസന വകുപ്പ് ഡയരക്ടര്‍ ഷീബ ജോര്‍ജ് എന്നിവര്‍ക്കും ഉപഹാരം കൈമാറി. ബാലവേല, ബാലഭിക്ഷാടന, തെരുവ് ബാല്യ വിമുക്ത കേരളത്തിനായി നാല് ജില്ലകളില്‍ ആരംഭിച്ചിട്ടുള്ള ശരണബാല്യം പദ്ധതി മറ്റ് ജില്ലകളിലേക്കും ഉടന്‍ വ്യപിപ്പിക്കുമെന്ന് മന്ത്രി പറഞ്ഞു. ശരണബാല്യം പദ്ധതി കൂടുതല്‍ കാര്യക്ഷമമാക്കാന്‍ ഉടന്‍ യോഗം ചേരുമെന്നും മന്ത്രി അറിയിച്ചു.