മൊഗാദിഷു: സൊമാലിയന്‍ പാര്‍ലമെന്റിനു സമീപത്ത് കാര്‍ബോംബ് സ്‌ഫോടനം. രണ്ടു സൈനികര്‍ കൊല്ലപ്പെട്ടു. നിരവധി പേര്‍ക്ക് പരുക്കേല്‍ക്കുകയും ചെയ്തു.

സൊമാലിയന്‍ തലസ്ഥാന നഗരിയായ മൊഗാദിഷുവിലാണ് സംഭവം. സുരക്ഷാ ചെക്ക്‌പോയിന്റില്‍ സംശയം തോന്നിയ കാര്‍ പിടിച്ചിട്ടപ്പോള്‍ പൊട്ടിത്തെറിക്കുകയായിരുന്നു.

പത്തു പേര്‍ക്കാണ് പരുക്കേറ്റതെന്ന് ചില റിപ്പോര്‍ട്ടുകളുണ്ട്. പരുക്കേറ്റവരില്‍ റിക്ഷാ ഡ്രൈവര്‍മാരുമുണ്ട്.

പ്രസിഡന്റിന്റെ കൊട്ടാരത്തിലേക്കുള്ള റോഡിലാണ് സ്‌ഫോടനമുണ്ടായത്. ഇവിടെ പുകലപടലം നിറഞ്ഞിരിക്കുകയാണ്.

ഒരു കാറും ഇരുചക്ര വാഹനവും കത്തിക്കരിഞ്ഞ നിലയിലാണ്.

14 പേര്‍ കൊല്ലപ്പെട്ട ബോംബ് സ്‌ഫോടനത്തിനു മൂന്നു ദിവസത്തിനു പിന്നാലെയാണ് മൊഗാദിഷുവില്‍ വീണ്ടും സ്‌ഫോടനം. അല്‍ ശബാബ് തീവ്രവാദ സംഘത്തിന്റെ നേതൃത്വത്തില്‍ ഇടയ്ക്കിടെ ഇവിടെ ആക്രമണം ഉണ്ടാവാറുണ്ട്.