മലപ്പുറം: തദ്ദേശ സ്വയംഭരണ സ്ഥാപനങ്ങളുടെ മദ്യ നിരോധനാധികാരം പുനഃസ്ഥാപിക്കണമെന്നാവശ്യപ്പെട്ടു മദ്യവിരുദ്ധ ജനകീയ മുന്നണിയുടെ മദ്യവിരുദ്ധ മലപ്പുറം മെമ്മോറിയല്‍ 2018ന്റെ ഭാഗമായി ജില്ലയില്‍നിന്നു ശേഖരിച്ച അര ലക്ഷം ഒപ്പുകള്‍ അടങ്ങിയ നിവേദനം മന്ത്രി കെ.ടി ജലീലിനു കൈമാറി.
ജനുവരി 30ന് ഇയ്യച്ചേരി കുഞ്ഞികൃഷ്ണന്‍, ഫാദര്‍ വര്‍ഗീസ് മുഴുത്തേറ്റ്, ഒ.കെ കുഞ്ഞിക്കോമു മാസ്റ്റര്‍ എന്നിവരുടെ നേതൃത്വത്തില്‍ ജില്ലയില്‍ പര്യടനം നടത്തി ഫെബ്രുവരി 23നു സമാപിച്ച ജാഥയിലൂടെയാണ് ഒപ്പുകള്‍ ശേഖരിച്ചത്. തെരഞ്ഞെടുപ്പ് സമയത്ത് നല്‍കിയ വാഗ്ദാനങ്ങള്‍ ലംഘിച്ച് കേരളത്തെ മദ്യാലയമാക്കാന്‍ സര്‍ക്കാര്‍ നടത്തുന്ന നീക്കങ്ങളില്‍ നിവേദക സംഘം പ്രതിഷേധം രേഖപ്പെടുത്തി.
ഇയ്യച്ചേരി കുഞ്ഞികൃഷ്ണന്‍, സിദ്ദീഖ് മൗലവി അയിലക്കാട്, അബ്ദുല്‍ മജീദ് തിരൂര്‍, കേശവന്‍ അരിയല്ലൂര്‍, കുഞ്ഞുമുഹമ്മദ് പരപ്പനങ്ങാടി, റാഫി നിലമ്പൂര്‍, സലാം പറവണ്ണ, ടി.എ ഖാദര്‍, മുജീബ് കോക്കൂര്‍, പി.ഐ മുജീബ് പങ്കെടുത്തു.