കോഴിക്കോട്: പ്രസന്റ് സാര്‍... മീഞ്ചന്ത ആര്‍ട്‌സ് ആന്‍ഡ് സയന്‍സ് കോളജിലെ പഴയ ബി.എ ക്ലാസില്‍ നിന്നും  വീണ്ടും ആ ശബ്ദമുയര്‍ന്നു.
കോളജിലെ 1974-77 ബാച്ച് ബി.എ (എക്കണോമിക്‌സ്) വിദ്യാര്‍ഥികളും അവരുടെ പ്രിയ അധ്യാപകരും 39 വര്‍ഷത്തിനുശേഷം ഒത്തുചേര്‍ന്നപ്പോള്‍ എല്ലാവരുടെയും മനസിന് കൗമാരത്തിന്റെ ചെറുപ്പം. അധ്യാപകനും പിന്നീട് പ്രിന്‍സിപ്പലുമായിരുന്ന പ്രൊഫ. പി മുഹമ്മദ് കോയ വിദ്യാര്‍ഥികളുടെ ഹാജര്‍ വിളിച്ചുകൊണ്ടാണ് യോഗം ഉദ്ഘാടനം ചെയ്തത്. സദസില്‍ നിന്നും ഓരോരുത്തരായി പ്രസന്റ് സാര്‍ പറഞ്ഞു, പഴയ ഉഷാറോടെ.
സപ്തതി താണ്ടിയ അധ്യാപകരും ഷഷ്ഠിപൂര്‍ത്തി കഴിഞ്ഞ വിദ്യാര്‍ഥികളും ഏറെനേരം  ഓര്‍മകളുടെ ഓരം ചേര്‍ന്ന് നടന്നു. പൂര്‍വധ്യാപകരായ പ്രൊഫ. കെ അബൂബക്കര്‍, പ്രൊഫ. കെ.എം. മാലതി എന്നിവര്‍ ചടങ്ങിന് ആശംസകള്‍ അര്‍പ്പിച്ചു.

വി.പി സ്‌നേഹപ്രകാശ് അധ്യക്ഷനായി. അഡ്വ. എന്‍. നാരായണന്‍ നമ്പൂതിരി, രാജന്‍ തയ്യില്‍, സി.കെ സുബൈര്‍, രാജഗോപാല്‍, സി. സോമന്‍ എന്നിവര്‍ ഗൃഹാതുര സ്മരണകള്‍ പങ്കുവെച്ചു. പൂര്‍വധ്യാപകരായ പ്രൊഫ. എ.കെ. പ്രേമജം, പ്രൊഫ. കമലാഭായ്, പ്രൊഫ. കെ. അബൂബക്കര്‍, പ്രൊഫ. മുഹമ്മദ് കോയ, ഡോ. കെ.എം. മാലതി എന്നിവരെ പൊന്നാടയണിയിച്ച് ആദരിച്ചു. വി.എസ.് കൃഷ്ണന്‍ സ്വാഗതവും കെ.സുബ്രഹ്മണ്യന്‍ നന്ദിയും പറഞ്ഞു.