ഇരിട്ടി: ഫുട്‌ബോള്‍ ടൂര്‍ണമെന്റ് കഴിഞ്ഞ് മടങ്ങുകയായിരുന്ന രണ്ട് ക്ലബ് അംഗങ്ങള്‍ തമ്മില്‍ നടന്ന സംഘര്‍ഷത്തില്‍ അഞ്ചുപേര്‍ക്ക് ഗുരുതര പരുക്ക്.
പെരുമ്പറമ്പ് കപ്പച്ചേരിയില്‍ നടന്ന ഫുട്‌ബോള്‍ ടൂര്‍ണമെന്റ് കഴിഞ്ഞ് മടങ്ങുകയായിരുന്ന കോളിക്കടവ് ഇ.കെ നായനാര്‍ ക്ലബ് അംഗങ്ങളെയാണ് പെരുമ്പറമ്പ് അളപ്രവോയ്‌സ് ക്ലബ് അംഗങ്ങള്‍ സംഘം ചേര്‍ന്ന് ആക്രമിച്ചത്.
സംഭവത്തില്‍ ഗുരുതരമായി പരുക്കേറ്റ കോളിക്കടവ് ക്ലബ് അംഗങ്ങളായ വിഷ്ണു (22), നിധീഷ് (21), മഹേഷ് (26) അമല്‍ (19). വിപിന്‍ (20) എന്നിവരെ പരിയാരം മെഡിക്കല്‍ കോളജില്‍ പ്രവേശിപ്പിച്ചു. അളപ്രവോയ്‌സ് ക്ലബംഗങ്ങളായ ഇരുപതോളം പേര്‍ ചേര്‍ന്ന് കോളിക്കടവ് ക്ലബ്ബ് അംഗങ്ങള്‍ സഞ്ചരിച്ച വാഹനം തടഞ്ഞ് ആക്രമിക്കുകയായിരുന്നെന്നാണ് പരാതി.
സംഭവത്തില്‍ രണ്ടുപേരെ ഇരിട്ടി പൊലിസ് അറസ്റ്റ് ചെയ്തു. പെരുമ്പറമ്പ് അളപ്ര. വിപിന്‍ ഭവനില്‍ വിവേക് (32), അളപ്ര കടുമ്പേരിഹൗസില്‍ അനില്‍ രാജ് (28) എന്നിവരെയാണ് ഇരിട്ടി എസ്.ഐ പി.സി സഞ്ജയ് കുമാറും സംഘവും പിടികൂടിയത്. മട്ടന്നൂര്‍ കോടതിയില്‍ ഹാജരാക്കിയ ഇവരെ 14 ദിവസത്തേക്ക് റിമാന്റ് ചെയ്തു.
സംഭവവുമായി ബന്ധപ്പെട്ട് 15 പേര്‍ക്കെതിരേ ജാമ്യമില്ലാ വകുപ്പു പ്രകാരം ഇരിട്ടി പൊലിസ് കേസെടുത്തു. മറ്റു പ്രതികള്‍ക്കായി അന്വേഷണം ശക്തമാക്കി.