തിരുവനന്തപുരം: സംസ്ഥാനത്ത് ചെറുമീനുകളെ പിടിക്കുന്നത് നിരോധിച്ചുകൊണ്ടുള്ള ഉത്തരവില്‍ ഇളവുവരുത്താന്‍ സര്‍ക്കാര്‍ തലത്തില്‍ നീക്കം. ട്രോളിങ് ബോട്ട് ഉടമകളുടെ സമ്മര്‍ദമാണ് ഇതിനു മുന്നില്‍. വ്യവസ്ഥയില്‍ ഇളവു വരുത്തിക്കൊണ്ടുള്ള ഉത്തരവിന്റെ കരടുരൂപം തയാറാക്കിക്കഴിഞ്ഞു. ഇപ്പോള്‍ തന്നെ ഫലത്തില്‍ നിരോധനം കടലാസിലൊതുങ്ങിയിട്ടുണ്ടെന്നും ഇത് സംസ്ഥാനത്തെ മത്സ്യസമ്പത്തിന്റെ ഭാവിക്ക് ഗുരുതരമായ ഭീഷണി ഉയര്‍ത്തുന്നതായും മത്സ്യത്തൊഴിലാളി സംഘടനാ നേതാക്കള്‍ ചൂണ്ടിക്കാട്ടുന്നു.
മത്സ്യസമ്പത്തിന്റെ സംരക്ഷണത്തിനായി കേരളത്തില്‍ 58 ഇനം ചെറുമത്സ്യങ്ങളെ പിടിക്കുന്നത് നിരോധിക്കണമെന്ന് കേന്ദ്ര സമുദ്ര ഗവേഷണ കേന്ദ്രം നിര്‍ദേശിച്ചതനുസരിച്ചാണ് അവയെ പിടിക്കുന്നത് നിരോധിച്ചുകൊണ്ട് സര്‍ക്കാര്‍ ഉത്തരവിറക്കിയത്. മത്സ്യത്തൊഴിലാളി സംഘടനകള്‍ ഇത് അംഗീകരിച്ചെങ്കിലും എതിര്‍ക്കുന്ന നിലപാടാണ് ട്രോളിങ് ബോട്ട് ഉടമകള്‍ സ്വീകരിച്ചത്. നിരോധനം ലംഘിച്ച് ചെറുമത്സ്യങ്ങളെ പിടിച്ച ചില ട്രോളിങ് ബോട്ടുകള്‍ക്കെതിരേ ഫഷറീസ് വകുപ്പ് അധികൃതര്‍ നടപടി സ്വീകരിച്ചു തുടങ്ങിയതോടെയാണ് ഉടമകള്‍ ഉത്തരവിനെതിരേ രംഗത്തുവന്നത്.
പിടിച്ചെടുത്ത മത്സ്യങ്ങളില്‍ 50 ശതമാനത്തിലധികം ചെറുമത്സ്യങ്ങള്‍ ഉണ്ടങ്കില്‍ മാത്രം നടപടി സ്വീകരിച്ചാല്‍ മതിയെന്നാണ് അവര്‍ ആവശ്യപ്പെടുന്നത്. ഒട്ടും ചെറുമത്സ്യങ്ങള്‍ ഉള്‍പ്പെടാതെ മത്സ്യബന്ധനം അസാധ്യമാണെന്ന വാദവും അവര്‍ ഉയര്‍ത്തുന്നു. ട്രോളിങ് ബോട്ട് ഉടമകളെ അനുകൂലിച്ചുകൊണ്ട് ചില സമുദ്ര ശാസ്ത്രജ്ഞരും രംഗത്തുണ്ട്. അവരുടെ വാദത്തിന്റെ പേരു പറഞ്ഞും ചെറുമത്സ്യങ്ങളെ ഉപയോഗിച്ചുള്ള ഉല്‍പന്നങ്ങള്‍ വിപണനം ചെയ്യുന്ന ബിസിനസ് ലോബിയുടെ സമ്മര്‍ദത്തിനു വഴങ്ങിയുമാണ് നിരോധനത്തില്‍ ഇളവു വരുത്തുന്നതെന്ന് മത്സ്യത്തൊഴിലാളി സംഘടനാ നേതാക്കള്‍ ആരോപിക്കുന്നു.
ചെറുമത്സ്യങ്ങളെ കൂട്ടത്തോടെ കോരിയെടുത്ത് കോഴിത്തീറ്റയും മത്സ്യത്തീറ്റയും വളവും നിര്‍മിക്കുകയാണ് ഇവര്‍ ചെയ്യുന്നത്. തമിഴ്‌നാട്ടിലെയും കര്‍ണാടകയിലെയും കോഴിത്തീറ്റ, മത്സ്യത്തീറ്റ, വളം ഫാക്ടറികളിലേക്കാണ് കേരള തീരത്തുനിന്ന് പിടിക്കുന്ന ചെറുമത്സ്യങ്ങളെ കൊണ്ടുപോകുന്നത്. ചിലയിനം മീന്‍കുഞ്ഞുങ്ങളെ സൗന്ദര്യവര്‍ധനയ്ക്കുള്ള ലേപനം ഉണ്ടാക്കാനും ഉപയോഗിക്കുന്നുണ്ട്. ഇത്തരം ഫാക്ടറികളും സമ്മര്‍ദത്തിനു പിന്നിലുള്ളതായി ചൂണ്ടിക്കാണിക്കപ്പെടുന്നു.
ചെറുമീനുകളുടെ കാര്യത്തില്‍ മറ്റു സംസ്ഥാനങ്ങള്‍ ജാഗ്രത പുലര്‍ത്തുമ്പോഴാണ് കേരളം നിരോധനം അട്ടിമറിക്കാനൊരുങ്ങുന്നത്. തമിഴ്‌നാട്ടില്‍ 113ഉം കര്‍ണാടകയില്‍ 72ഉം ആന്ധ്രപ്രദേശില്‍ 68ഉം ഇനം ചെറുമീനുകളെ പിടിക്കുന്നത് നിരോധിച്ചിട്ടുണ്ട്. ഈ സംസ്ഥാനങ്ങള്‍ നിരോധനം കര്‍ശനമായി നടപ്പാക്കുന്നുമുണ്ട്.
കേരളത്തില്‍ നിലവിലുള്ള നിരോധനത്തില്‍ ഇളവു വരുത്തിക്കൊണ്ട് ഉത്തരവിറങ്ങിയാല്‍ അതിനെതിരേ പരമ്പരാഗത മത്സ്യത്തൊഴിലാളികള്‍ ശക്തമായ സമരപരിപാടികളുമായി രംഗത്തുവരുമെന്ന് സംഘടനാ നേതാക്കള്‍ പറയുന്നു.