സ്വന്തം ലേഖകന്‍
തിരുവനന്തപുരം : ഓര്‍ത്തഡോക്‌സ് -യാക്കോബായ സഭാ തര്‍ക്കത്തില്‍ ഇടപ്പെട്ട് സംസ്ഥാന സര്‍ക്കാര്‍ നിയമനിര്‍മാണത്തിന്.
മൃതദേഹങ്ങള്‍ സംസ്‌കരിക്കുന്നതു സംബന്ധിച്ച വിഷയത്തിലാണ് പ്രത്യേക ഓര്‍ഡിനന്‍സ് ഇറക്കുവാന്‍ മന്ത്രിസഭ തീരുമാനിച്ചത്. പള്ളികളുടെ ഉടമസ്ഥാവകാശം സംബന്ധിച്ച തര്‍ക്കം മൃതദേഹം സംസ്‌കരിക്കുന്നതിന് തടസ്സമാകുന്ന സംഭവങ്ങളുടെ പശ്ചത്താലത്തിലാണ് നിയമനിര്‍മാണം. ഇടവകയില ഏത് അംഗം മരിച്ചാലും പള്ളി സെമിത്തേരിയില്‍ അടക്കം ചെയ്യാന്‍ അനുമതിയുണ്ടാകും.
കുടുംബകല്ലറ ഏതുപള്ളിയിലാണോ അവിടെ ആ കുടുംബത്തിലുള്ളയാള്‍ മരണപ്പെട്ടാല്‍ സംസ്‌കരിക്കാന്‍ കഴിയും. പ്രാര്‍ത്ഥനകളും മരണാനന്തരശുശ്രൂഷകളും ബന്ധുക്കള്‍ക്ക് താല്‍പര്യമുള്ള പുരോഹതിനെവച്ച് പുറത്ത് നടത്തണം. മരണാനന്തരശുശ്രൂഷകള്‍ ഇഷ്ടമുള്ള സ്ഥലത്ത് വെച്ച് നടത്താന്‍ അവര്‍ക്ക് അവകാശമുണ്ട്.
തടസ്സപ്പെടുത്തവര്‍ക്കെതിരേ കേസെടുക്കും. സുപ്രിംകോടതിയുടെ വിധി കൂടി കണക്കിലെടുത്ത് വിശദമായ പരിശോധനയ്ക്ക് ശേഷമാണ് ഓര്‍ഡിനന്‍സ് ഗവര്‍ണര്‍ക്ക് അയക്കുന്നത്. സഭാ തര്‍ക്കത്തില്‍ സമവായമില്ലാതെ വന്നതിനെ തുടര്‍ന്നാണ് ഓര്‍ഡിനന്‍സ് ഇറക്കേണ്ടിവന്നതെന്ന് മുഖ്യമന്ത്രി പിണറായി വിജയന്‍ വാര്‍ത്തസമ്മേളനത്തില്‍ വിശദീകരിച്ചു.