തിരുവനന്തപുരം: ഹര്‍ത്താലിന്റെ മറവില്‍ മാധ്യമ പ്രവര്‍ത്തകര്‍ക്ക് നേരെ കടുത്ത ആക്രമണം. സംസ്ഥാനത്തിന്റെ പല ഭാഗത്തും നിരവധി മാധ്യമ പ്രവര്‍ത്തകരാണ് അക്രമിക്കപ്പെട്ടു കൊണ്ടിരിക്കുന്നത്. ഇതിനാല്‍ ബിജെപി പരിപാടികള്‍ ബഹിഷ്‌കരിക്കാനും റിപ്പോര്‍ട്ട് ചെയ്യാതിരിക്കാനും, വാര്‍ത്താ സമ്മേളനങ്ങള്‍ ബഹിഷ്‌കരിക്കാനും പത്ര പ്രവര്‍ത്തക യൂണിയന്‍ സംസ്ഥാന കമ്മറ്റി നിര്‍ദേശിച്ചിരിക്കുകയാണ്.

കൊല്ലത്തു മാധ്യമ പ്രവര്‍ത്തകര്‍ക്കു നേരെ കയ്യേറ്റം നടന്നു. ബി.ജെ.പി പ്രവര്‍ത്തകര്‍ ചിന്നക്കടയില്‍ സി.പി.എമിന്റെ ബാനറുകള്‍ നഷിപ്പിച്ചു. ഇതിന്റെ ഫോട്ടോ എടുക്കാന്‍ ശ്രമിച്ച മംഗളം ഫോട്ടോ ഗ്രാഫറായ മോഹന്‍ തമ്പി, ജനയുഗം ഫോട്ടോഗ്രാഫറായ സുരേഷ് ചൈത്രം എന്നിവരെയാണ് മര്‍ദിച്ചത്.