ഹരിപ്പാട്: മദ്യപിച്ച് ലക്കുകെട്ട യുവാവ് എന്‍.ടി.പി.സി പ്ലാന്റിലേക്ക് വാഹനം ഓടിച്ച് കയറ്റി. സുരക്ഷാ സംവിധാനം ഭേദിച്ചതിനും അപകടകരമായി വാഹനം ഓടിച്ചതിനും കനക കുന്ന് പൊലിസ്  ഇയാള്‍ക്കെതിരേ കേസെടുത്തു.
ചൂളത്തെരുവ് സുരേഷ് ഭവനത്തില്‍ സുരേഷ് (27) ആണ് മദ്യപിച്ച് അമിത വേഗത്തില്‍ വാഹനം ഓടിച്ച് അപകടത്തില്‍പെട്ടത്. ശനിയാഴ്ച വൈകിട്ട് നാലു മണിയോടെയായിരുന്നു സംഭവം.
കാഞൂര്‍ ജങ്ഷനില്‍ നിന്നും എന്‍.ടി.പി.സി റോഡിലൂടെ അമിത വേഗത്തില്‍ കാറോടിച്ച് എന്‍.ടി.പി.സിയുടെ പ്രധാന കവാടത്തില്‍ എത്തിയപ്പോള്‍ മറ്റൊരു വാഹനത്തിന് പോകാനായി തുറന്ന ഗേറ്റിലൂടെ പ്ലാന്റിനുള്ളിലേക്ക് ഓടിച്ച് കയറ്റുകയായിരുന്നു.
അമിത വേഗത്തില്‍ പ്ലാന്റിനുള്ളിലേക്ക് കടന്ന വാഹനം അഡ്മിനിസ്‌ട്രേറ്റീവ് ഓഫിസിനു സമീപത്തെ ഡിവൈഡര്‍ ഇടിച്ച് തകര്‍ത്ത ശേഷമാണ് നിന്നത്. സുരേഷ് സ്ഥലത്തെത്തിയ സി.ഐ.എസ്.എഫ് ഉദ്യോഗസ്ഥരെ കൈയേറ്റം ചെയ്യാന്‍ ശ്രമിച്ചതായും പരാതിയുണ്ട്.