മലപ്പുറം: കാരാത്തോട്ടെ മാലിന്യസംസ്‌കരണ കേന്ദ്രത്തിലെ മാലിന്യ സംസ്‌കരണവുമായി ബന്ധപ്പെട്ട പ്രശ്‌നങ്ങള്‍ക്കു പരിഹാരം. സമരക്കാരുടെ ആവശ്യങ്ങള്‍ ഭാഗികമായി അംഗീകരിച്ച നഗരസഭ അധികൃതര്‍ക്ക് ഇനി തലവേദനയാകുക വ്യാപാരികളുടെ പ്രതിഷേധമാണ്. നഗരസഭാധ്യക്ഷ സി.എച്ച് ജമീലയുമായി നഗരസഭയിലും മുന്‍മന്ത്രി പി.കെ കുഞ്ഞാലിക്കുട്ടിയുടെ വീട്ടിലുംവച്ചു ചേര്‍ന്ന മണിക്കൂറുകള്‍ നീണ്ട ചര്‍ച്ചയിലാണ് ഒരാഴ്ചയിലധികമായി തുടരുന്ന മാലിന്യപ്രശ്‌നത്തിനു പരിഹാരമായത്.
നിലവില്‍ നഗരത്തില്‍ കുമിഞ്ഞുകൂടിയ മാലിന്യങ്ങള്‍ കാരാത്തോടുള്ള സംസ്‌കരണ കേന്ദ്രത്തിലേക്ക് മാറ്റാന്‍ സമരക്കാരുമായി നടത്തിയ ചര്‍ച്ചയില്‍ തീരുമാനമായി. അതേസമയം, ഹോട്ടലുകള്‍, വ്യാപാരസ്ഥാപനങ്ങള്‍, വീടുകള്‍, ക്വാര്‍ട്ടേഴ്‌സ് എന്നിവിടങ്ങളിലെ ഭക്ഷണ ജൈവ മാലിന്യങ്ങള്‍ നഗരസഭ ഇനിമുതല്‍ ഏറ്റെടുക്കില്ലെന്ന തീരുമാനം വരുംദിവസങ്ങളില്‍ പ്രതിഷേധങ്ങള്‍ക്കു കാരണമാകും. ഇത്തരം മാലിന്യങ്ങള്‍ക്ക് ഉറവിട മാലിന്യ സംസ്‌കരണ സംവിധാനങ്ങള്‍ ഉപയോഗിക്കണമെന്നാണ് നഗരസഭയുടെ നിര്‍ദേശം. കാരത്തോട്ടെ മാലിന്യ സംസ്‌കരണ കേന്ദ്രത്തിലെ പരിസരവാസികളുമായി നടത്തിയ ചര്‍ച്ചയിലേക്ക് വ്യാപാര സംഘടനാ പ്രതിനിധികളെ ക്ഷണിച്ചിരുന്നില്ല.
ഇനിമുതല്‍ കാരാത്തോട്ടെ മാലിന്യ സംസ്‌കരണ കേന്ദ്രത്തില്‍ നഗരത്തില്‍നിന്നുള്ള ചപ്പുചവറുകള്‍ മാത്രമാക്കി കുറയ്ക്കും. ഇതിനുള്ള നടപടികളെടുക്കും. അതിലേക്കായി പരിസ്ഥിതി സൗഹൃദ സാങ്കേതിക വിദ്യകള്‍ പരിഗണിക്കും. പൊതുസ്ഥലങ്ങളില്‍ മാലിന്യം വലിച്ചെറിയുന്നതു തടയാന്‍ കാമറ സംവിധാനം ഏര്‍പ്പെടുത്തുമെന്നും പൊതുസ്ഥലത്ത് മാലിന്യം നിക്ഷേപിക്കുന്നവര്‍ക്കെതിരേ കര്‍ശന നടപടികളെടുക്കുമെന്നും യോഗത്തില്‍ നഗരസഭാധ്യക്ഷ അറിയിച്ചു.