ഭോപ്പാല്‍: വിവാദങ്ങള്‍ക്കും വിമര്‍ശനങ്ങള്‍ക്കുമൊടുവില്‍ ബോളിവുഡ് സിനിമയായ ഉഡ്താ പഞ്ചാബിന് സെന്‍ഡ്രല്‍ ബോര്‍ഡ് ഓഫ് ഫിലിം സര്‍ട്ടിഫിക്കേഷന്‍ പ്രദര്‍ശനാനുമതി നല്‍കി. 13 സീനുകള്‍ കട്ട് ചെയ്ത് 'എ'സര്‍ട്ടിഫിക്കറ്റോടെയാണ് പ്രദര്‍ശനാനുമതി നല്‍കുന്നതെന്ന് സി.എഫ്.ബി.സി അധ്യക്ഷന്‍ പഹലജ് നിഹലാനി പറഞ്ഞു.

സിനിമയില്‍ സെന്‍സര്‍ ബോര്‍ഡ് ഇടപെടലിനിടെ നിര്‍മാതാക്കള്‍ നല്‍കിയ ഹരജിയില്‍ ബോംബെ ഹൈക്കോടതി ഇന്നു വിധി പറയാനിരിക്കെയാണ് സെന്‍സര്‍ബോര്‍ഡ് നിലപാട് അറിയിച്ചത്. ചിത്രത്തിന്റെ പേരില്‍ നിന്നും പഞ്ചാബിനേയും സിനിമയില്‍ നിന്നും 89 സീനുകളും വെട്ടിമാറ്റണമെന്ന സെന്‍സര്‍ ബോര്‍ഡ് നിര്‍ദ്ദേശത്തിനെതിരെ നിരവധി വിമര്‍ശനങ്ങളാണ് ഉയര്‍ന്നത്. അതേസമയം ചിത്രം പഞ്ചാബിനെ ഒന്നാകെ അപകീര്‍ത്തിപ്പെടുത്തുന്ന സിനിമയാണെന്നായിരുന്നു സെന്‍സര്‍ബോര്‍ഡ് നിലപാട്

ഇപ്പോള്‍ സെന്‍സര്‍ ബോര്‍ഡ് 13 വെട്ടിമാറ്റലുകളോടെ ചിത്രത്തിന് 'എ' സര്‍ട്ടിഫിക്കറ്റോടെ പ്രദര്‍ശനാനുമതി നല്‍കിയെന്ന് നിഹലാനി പറഞ്ഞു.ഇതോടെ സെന്‍സര്‍ ബോര്‍ഡിന്റെ ജോലി കഴിഞ്ഞു. തങ്ങളുടെ നടപടിയില്‍ സംവിധായകന് എതിര്‍പ്പുണ്ടെങ്കില്‍ കോടതിയെ സമീപിക്കാമെന്നും നിഹലാനി പറഞ്ഞു.

പഞ്ചാബിലെ ലഹരി മാഫിയയുടെ കഥ പറയുന്ന ചിത്രത്തിന്റെ സംവിധായകന്‍ അഭിഷേക് ചൗബെയാണ്. ജൂണ്‍ 17 ആണ് ചിത്രത്തിന്റെ റിലീസിങ് തിയ്യതി.