മാഡ്രിഡ്: സ്പാനിഷ് വമ്പൻമാരായ റയൽ മാഡ്രിഡിനൊപ്പം ഫ്രഞ്ച് സൂപ്പർതാരം കിലിയൻ എംബാപ്പെ നടത്തുന്ന പ്രകടനങ്ങളെ കുറിച്ച് സംസാരിക്കുകയാണ് പരിശീലകൻ കാർലോ ആന്‍സലോട്ടി. റയലിന്റെ എക്കാലത്തെയും മികച്ച ഇതിഹാസ താരമായ ക്രിസ്റ്റ്യാനോ റൊണാൾഡോയുടെ അതേ നിലവാരത്തിലുള്ള പ്രകടനം എംബാപ്പെക്ക് നടത്താൻ സാധിക്കുമോ എന്നതിനെ കുറിച്ചാണ് ആന്‍സലോട്ടി സംസാരിച്ചത്. റൊണാൾഡോയുടെ അതേ ലെവലിൽ എത്താൻ എംബാപ്പെ ഇനിയും ഒരുപാട് കഠിനാധ്വാനം ചെയ്യണമെന്നാണ് റയൽ പരിശീലകൻ പറഞ്ഞത്. 90 മിനിറ്റ്സിനു നൽകിയ അഭിമുഖത്തിൽ സംസാരിക്കുകയായിരുന്നു ആന്‍സലോട്ടി.

'എംബാപ്പെ ഒരുപാട് കഴിവുള്ള താരമാണ്. റൊണാൾഡോ റയലിൽ നടത്തിയ പോലെയുള്ള മികച്ച പ്രകടനങ്ങൾ നടത്താൻ എംബാപ്പെക്ക് സാധിക്കും. ഇപ്പോൾ എംബാപ്പെ ടീമിനൊപ്പമുള്ള യാത്ര തുടങ്ങിയിട്ടേയുള്ളൂ. എന്നാൽ റൊണാൾഡോയുടെ നിലവാരത്തിൽ എത്തുക എന്നുള്ളത് എംബാപ്പെക്ക് അത്ര എളുപ്പമുള്ള കാര്യമല്ല. അതിനുവേണ്ടി അവൻ നന്നായി കഠിനാധ്വാനം ചെയ്യണം. ടീമിലെ എല്ലാവരും എംബാപ്പെയുടെ ഹാട്രിക്കിന് വേണ്ടി കാത്തിരിക്കുകയായിരുന്നു. ഒടുവിൽ അവൻ അത് ചെയ്തു എംബാപ്പെ മാത്രമല്ല നിരവധി താരങ്ങൾ നമ്മുടെ ടീമിൽ ഉണ്ട്. അവർ മികച്ച പ്രകടനങ്ങൾ നടത്തിയാൽ ടീമിന് ഇനിയും മുന്നോട്ട് പോവാം,' കാർലോ അൻസലോട്ടി പറഞ്ഞു. 

യുവേഫ ചാമ്പ്യൻസ് ലീഗിൽ സെക്കൻഡ് ലെഗ്ഗിൽ മാഞ്ചസ്റ്റർ സിറ്റിക്കെതിരെയാണ് എംബാപ്പെ ഹാട്രിക് നേടിയത്. രണ്ടാം പാദത്തിൽ ഒന്നിനെതിരെ മൂന്ന് ഗോളുകൾക്കാണ് മാഞ്ചസ്റ്റർ സിറ്റിയെ റയൽ പരാജയപ്പെടുത്തിയത്. ഇതോടെ 6-3 എന്ന അഗ്രഗേറ്റ് സ്‌കോറിൽ അടുത്ത റൗണ്ടിലേക്ക് മുന്നേറാനും റയലിന് സാധിച്ചു. റയൽ മാഡ്രിഡിനായി ഈ സീസണിൽ ഇതുവരെ 26 ഗോളുകളും മൂന്ന് അസിസ്റ്റുകളുമാണ് എംബാപ്പെ നേടിയിട്ടുള്ളത്. എന്നാൽ സീസണിന്റെ തുടക്കത്തിൽ പല സമയങ്ങളിലും എംബാപ്പെ തന്റെ പ്രകടനങ്ങളുടെ പേരിൽ വിമർശിക്കപ്പെട്ടിണ്ട്.