ഷാർജ: റമദാനിൽ അർധരാത്രിക്കു ശേഷവും തുറന്നു പ്രവർത്തിക്കുന്ന ഭക്ഷ്യശാലകൾ പ്രത്യേക പെർമിറ്റ് എടുക്കണമെന്ന് ഷാർജ മുനിസിപ്പാലിറ്റി അറിയിച്ചു. ഇത് സംബന്ധിച്ച അപേക്ഷകൾ സ്വീകരിക്കാനാരംഭിച്ചു. ഷാർജ മുനിസിപ്പാലിറ്റിയുടെ വെബ്സൈറ്റിൽ കൺട്രോൾ ആൻഡ് ഇൻസ്പെക്ഷൻ ഓപ്ഷനിൽ പ്രവേശിച്ചാണ് അപേക്ഷ നൽകേണ്ടത്.

റമദാനിൽ പകൽ ഭക്ഷണം പാകം ചെയ്യുന്ന ഭക്ഷ്യശാലകളും ഇഫ്താറിന് മുൻപ് ഭക്ഷണം പുറത്തുവച്ച് പ്രദർശിപ്പിക്കുന്ന സ്‌ഥാപനങ്ങളും പ്രത്യേക അനുമതി എടുക്കണമെന്നും നഗരസഭ അറിയിച്ചിട്ടുണ്ട്. അതേസമയം, നിർമാണ കമ്പനികൾക്ക് അനുമതി ലഭിക്കില്ല. 

റമദാനിൽ പകൽ സമയങ്ങളിൽ ഭക്ഷണം തയ്യാറാക്കുന്നതിനും വിൽക്കുന്നതിനുമുള്ള പെർമിറ്റുകളും, ഇഫ്താറിന് മുമ്പ് കടകൾക്ക് പുറത്ത് ഭക്ഷണം പ്രദർശിപ്പിക്കുന്നതിനുള്ള പെർമിറ്റുകളും നേരത്തെ ഷാർജ സിറ്റി മുനിസിപ്പാലിറ്റി നൽകാനാരംഭിച്ചിരുന്നു. പകൽ സമയത്ത് ഭക്ഷണം തയ്യാറാക്കി പ്രദർശിപ്പിക്കുന്നതിന് 3,000 ദിർഹവും ഇഫ്താറിന് തൊട്ടുമുമ്പ് ഭക്ഷണശാലകൾക്ക് മുന്നിൽ ഭക്ഷണം പ്രദർശിപ്പിക്കുന്നതിന് 500 ദിർഹവുമാണ് പെർമിറ്റ് ഫീസ്. അൽ നാസിരിയ സെന്റർ, അൽ ഖാലിദിയ സെന്റർ എന്നിങ്ങനെ ഷാർജ മുനിസിപ്പാലിറ്റിയുടെ വിവിധ കൗണ്ടറുകളിൽ ഭക്ഷണശാലകൾക്ക് പെർമിറ്റിനായി അപേക്ഷിക്കാം.

മാർച്ച് 1 ശനിയാഴ്ച റമദാൻ ആരംഭിക്കുമെന്നാണ് ജ്യോതിശാസ്ത്ര കണക്കുകൂട്ടലുകൾ പ്രകാരം പ്രതീക്ഷിക്കുന്നത്. അതേസമയം, കൃത്യമായ തീയതി മാസം കാണുന്നതിനെ ആശ്രയിച്ചിരിക്കും. മാസം 30 ദിവസം നീണ്ടുനിൽക്കുമെന്നാണ് പ്രതീക്ഷിക്കുന്നത്. റെസ്റ്റോറൻ്റുകൾ, കഫറ്റീരിയകൾ, ബേക്കറികൾ, ഷോപ്പിംഗ് മാളുകൾ എന്നിവയ്ക്ക് 500 ദിർഹം ഫീസുള്ള പെർമിറ്റുകൾ ബാധകമാണെന്നാണ് മുനിസിപ്പാലിറ്റി സോഷ്യൽ മീഡിയ പോസ്റ്റിലൂടെ അറിയിച്ചത്.

Sharjah Municipality introduces special permit for restaurants to operate past midnight during Ramadan, ensuring food safety and adherence to regulations.