ഉരുവച്ചാല്‍ (കണ്ണൂര്‍): മാലൂര്‍ കരിവെള്ളൂരില്‍ യുവാവിനെ ദുരൂഹ സാഹചര്യത്തില്‍ മരിച്ച നിലയില്‍ കണ്ടെത്തിയ സംഭവത്തില്‍ പ്രതി അറസ്റ്റില്‍. സുഹൃത്തും ഓട്ടോ ഡ്രൈവറുമായ വടക്കയില്‍ വീട്ടില്‍ മനോളി ഷിനോജി (32) നെയാണ് സി.ഐ കെ. രാജീവ് കുമാര്‍, എസ്.ഐ ടി.കെ രജീഷ് എന്നിവരുടെ നേതൃത്വത്തില്‍ അറസ്റ്റ് ചെയ്തത്.
കരിവെള്ളൂരിലെ പൃഥ്വിയില്‍ ഗംഗാധരന്റെ മകന്‍ ദിജിലി (32)നെയാണ് കഴിഞ്ഞദിവസം രാവിലെ വീടിനു സമീപത്തു കഴുത്തില്‍ കയര്‍ കുരുക്കി മരിച്ച നിലയില്‍ കണ്ടെത്തിയത്.
വ്യക്തിപരമായ പ്രശ്‌നങ്ങളില്‍ ഷിനോജും ദിജിലും തമ്മില്‍ കടുത്ത വൈരാഗ്യവും തര്‍ക്കവും ഉണ്ടായിരുന്നതായി പൊലിസ് പറഞ്ഞു. വീടിന്റെ പിറകില്‍ ഒളിച്ചിരുന്ന ഷിനോജ് ദിജില്‍ എത്തിയ സമയത്ത് ചാടിവീണ് പ്ലാസ്റ്റിക് കയര്‍ കൊണ്ട് കഴുത്തില്‍ മുറുക്കി ശ്വാസം മുട്ടിച്ചു കൊല്ലുകയായിരുന്നുവെന്ന് പൊലിസ് പറഞ്ഞു.
ഷിനോജിനെ കൂത്തുപറമ്പ് ജുഡീഷ്യല്‍ ഒന്നാം ക്ലാസ് മജിസ്‌ട്രേറ്റ് കോടതിയില്‍ ഹാജരാക്കി റിമാന്‍ഡ് ചെയ്തു.