തിരുവനന്തപുരം: ഇന്ന് ആറു പേര്‍ക്ക് കൊവിഡ് 19 സ്ഥിരീകരിച്ച സ്ഥിതിയില്‍ കാസര്‍ക്കോട്ട് കടുത്ത നിയന്ത്രണമേര്‍പ്പെടുത്തുന്നതായി മുഖ്യമന്ത്രി പിണറായി വിജയന്‍ അറിയിച്ചു. കേരളത്തില്‍ 12 പേര്‍ക്ക് കൂടി കൊവിഡ് സ്ഥിരീകരിച്ചു. കൊച്ചിയില്‍ അഞ്ചു പേര്‍ക്കും കാസര്‍കോട് ആറുപേര്‍ക്കും പാലക്കാട് ഒരാള്‍ക്കുമാണ് രോഗം സ്ഥിരീകരിച്ചതെന്നാണ് മുഖ്യമന്ത്രി പിണറായി വിജയന്‍ വാര്‍ത്താ സമ്മേളനത്തില്‍ അറിയിച്ചത്. ഇതോടെ രോഗം സ്ഥിരീകരിച്ചവരുടെ അംഗസംഖ്യ 40 ആയി ഉയര്‍ന്നു. സംസ്ഥാനത്തെ സ്ഥിതിഗതികള്‍ അതീവ ഗുരുതരമാണെന്ന് മുഖ്യമന്ത്രി അറിയിച്ചു. ഈ സാഹചര്യത്തില്‍ കാസര്‍കോട് ആരാധാനാലയങ്ങള്‍ രണ്ടാഴ്ചയും സര്‍ക്കാര്‍ ഓഫിസുകള്‍ ഒരാഴ്ചയും അടച്ചിടും. സംസ്ഥാനത്ത് അധ്യാപകര്‍ നാളെ മുതല്‍ സ്‌കൂളില്‍ പോവേണ്ടതില്ല

ഇന്നു മാത്രം പുതുതായി 55 പേരെ ആശുപത്രിയില്‍ പ്രവേശിപ്പിച്ചു. 5570 പേരെ രോഗബാധയില്ലെന്നു കണ്ടെത്തി വീട്ടിലേക്കു തിരിച്ചയച്ചു. ഇപ്പോള്‍ 44396 പേരാണ് കേരളത്തില്‍ നിരീക്ഷണത്തിലുള്ളത്. ഈ സാഹചര്യത്തില്‍ സംസ്ഥാനത്ത് കടുത്ത നിയന്ത്രണങ്ങള്‍ ഏര്‍പ്പെടുത്തുകയാണെന്ന് മുഖ്യമന്ത്രി അറിയിച്ചു.

ഞായറാഴ്ച കെ.എസ്.ആര്‍.ടി.സി സര്‍വിസും മെട്രോ സര്‍വിസും നിര്‍ത്തിവെക്കും. സംസ്ഥാനത്തെ ക്ലബുകളുടെ പ്രവര്‍ത്തനം നിര്‍ത്തിവെക്കണം. ആഘോഷങ്ങളും മത്സരങ്ങളും ഒഴിവാക്കണം. കടകള്‍ രാവിലെ പതിനൊന്നുമുതല്‍ വൈകുന്നേരം അഞ്ചുവരേ മാത്രം പ്രവര്‍ത്തിച്ചാല്‍ മതി. ഞായറാഴ്ചകളില്‍ വീടുകള്‍ ശുചീകരിക്കണം. ജനതാ കര്‍ഫ്യുവിന് പൂര്‍ണ പിന്തുണ പ്രഖ്യാപിച്ചു. നിര്‍ദേശം ലംഘിച്ചാല്‍ കടുത്ത നടപടി സ്വീകരിക്കുമെന്നും മുഖ്യമന്ത്രി അറിയിച്ചു.