തിരുവനന്തപുരം: അഡ്വാന്‍സല്ല, ആറുമാസമായുള്ള ക്ഷേമപെന്‍ഷനുകളുടെ കുടിശികയാണ് സര്‍ക്കാര്‍ കൊടുത്തുതീര്‍ക്കേണ്ടതെന്ന് യു.ഡി.എഫ്. കൊവിഡിന്റെ പശ്ചാത്തലത്തില്‍ സര്‍ക്കാര്‍ പ്രഖ്യാപിച്ച ആനുകൂല്യങ്ങളെ സ്വാഗതം ചെയ്യുകയാണെന്നും വിവാദത്തിനില്ലെന്നും യു.ഡി.എഫ് യോഗത്തിനുശേഷം കണ്‍വീനര്‍ ബെന്നി ബഹന്നാന്‍ വാര്‍ത്താസമ്മേളനത്തില്‍ പറഞ്ഞു.
സെപ്റ്റംബര്‍ വരെയുള്ള സാമൂഹ്യക്ഷേമ പെന്‍ഷനുകളാണ് കൊടുത്തുതീര്‍ത്തിട്ടുള്ളത്. ഈ മാസത്തേത് ഉള്‍പ്പെടെ ആറുമാസത്തെ കുടിശിക ഇപ്പോഴുണ്ട്. കുടിശികയില്‍നിന്ന് രണ്ടുമാസത്തേത് കൊടുക്കുമ്പോള്‍ എങ്ങനെയാണ് അഡ്വാന്‍സ് ആകുന്നത്. ആറുമാസത്തെ കുടിശിക തീര്‍ത്തുകൊടുക്കാനാണ് സര്‍ക്കാര്‍ തീരുമാനമെടുക്കേണ്ടത്.
ആരാധനാലയങ്ങള്‍ക്ക് നിയന്ത്രണം ഏര്‍പ്പെടുത്തിയ സാഹചര്യത്തില്‍ ബാറുകളും ബിവറേജസ് ഔട്‌ലറ്റുകളും താല്‍ക്കാലികമായി അടച്ചിടണം.
കൊവിഡിന്റെ പശ്ചാത്തലത്തില്‍ ഉണ്ടായ മാന്ദ്യം അതിജീവിക്കാന്‍ ഇന്ധനങ്ങള്‍ക്ക് ഏര്‍പ്പെടുത്തിയ എക്‌സൈസ് തീരുവ പിന്‍വലിക്കാന്‍ കേന്ദ്രം തയാറാകണം. കൊവിഡ് ഭീതി കാരണം കഴിഞ്ഞ ദിവസങ്ങളില്‍ നടന്ന സര്‍വകലാശാല പരീക്ഷകള്‍ എഴുതാന്‍ കഴിയാതെപോയവര്‍ക്ക് മറ്റൊരു അവസരംകൂടി നല്‍കണമെന്നും ബെന്നി ബഹന്നാന്‍ പറഞ്ഞു.