ന്യൂഡല്‍ഹി: അഞ്ച് റോഹിങ്ക്യകളെ കൂടി ഇന്ത്യ നാടു കടത്തി. ഒരു കുടുംബത്തിലെ അഞ്ച് പേരെയാണ് നാടുകടത്തിയത്. മുഹമ്മദ് അയാസ്, മുഹമ്മദ് റിയാസ്, അഹമദ് ഹുസൈന്‍, ത്വയ്യിബ ഖാത്തൂന്‍, ആസിദ ബീഗം എന്നിവരാണ് നടാു കടത്തപ്പെട്ടത്. ജനുവരി രണ്ടിന് മണിപ്പൂര്‍ അതിര്‍ത്തി വഴി ഇവരെ മ്യാന്‍മാറര്‍ അധികൃതര്‍ക്ക് കൈമാറിയതായി പൊലിസ് അറിയിച്ചു.

രേഖകളൊന്നും കൈവശമില്ലാതെ അനധികൃത കുടിയേറ്റത്തിന്റെ പേരില്‍ തടവിലായിരുന്നു ഇവരെന്ന് അസം എ.ഡി.ജിപി ഭാസ്‌കര്‍ ജ്യോതി മഹാന്ത പറഞ്ഞു.

കഴിഞ്ഞ ഒക്ടോബറില്‍ ഏഴു റോഹിങ്ക്യകളെ സര്‍ക്കാര്‍ നാടുകടത്തിയിരുന്നു. നിയമവിരുദ്ധമായി രാജ്യത്ത് എത്തുന്നവരെ തിരിച്ചയക്കുകയാണ് ചെയ്തതെന്നായിരുന്നു അന്നും ആഭ്യന്തരമന്ത്രാലയത്തിന്റെ വിശദീകരണം.

ആയിരം വര്‍ഷങ്ങള്‍ക്ക് മുമ്പ് മ്യാന്‍മാറിലേക്ക് കുടിയേറിയ മുസ്‌ലിം വ്യാപാരികളുടെ പിന്‍തുടര്‍ച്ചക്കാരാണ് റോഹിങ്ക്യന്‍ ജനത. മ്യാന്‍മാറില്‍ ഇവര്‍ക്ക് പൗര്വതമോ ഭൂവുടമസ്ഥാവകാശമോ സഞ്ചാര സ്വാതന്ത്ര്യമോ ഇല്ല.