ഹൈദരാബാദ്: ഫ്‌ളോറിഡ ആസ്ഥാനമായി പ്രവര്‍ത്തിക്കുന്ന ബിസിനസുകാരന്‍ ഹൈദരാബാദില്‍ കൊല്ലപ്പെട്ട സംഭവത്തിന് പിന്നില്‍ പെണ്‍കെണിയാണെന്ന് പൊലിസ്.
റിയല്‍ എസ്റ്റേറ്റ് ഏജന്റില്‍ നിന്ന് വാങ്ങിയ പണം തിരികെ നല്‍കാതിരുന്നതിനാണ് ചിഗുരുപതി ജയറാം എന്ന ബിസിനസുകാരനെ പെണ്‍കെണിയില്‍പെടുത്തി കൊലപ്പെടുത്തിയത്.

കേസുമായി ബന്ധപ്പെട്ട് റിയല്‍ എസ്റ്റേറ്റ് ഏജന്റ് രാകേഷ് റെഡ്ഡി, ഇയാളുടെ ഡ്രൈവര്‍ ശ്രീനിവസന്‍ എന്നിവരെ പൊലിസ് അറസ്റ്റ് ചെയ്തു. യുവതിയുടെ ചിത്രം വച്ച വാട്‌സ്ആപ് അക്കൗണ്ട് ഉപയോഗിച്ചാണ് ബിസിനസുകാരനെ ആളൊഴിഞ്ഞ വീട്ടിലേക്ക് വിളിച്ചു വരുത്തി കൊലപ്പെടുത്തിയത്.
കഴിഞ്ഞ ജനുവരി 31ന് വിജയവാഡക്കടുത്തുള്ള കൃഷ്ണ ജില്ലയിലെ നന്ദ്യഗാമ എന്ന സ്ഥലത്ത് ദേശീയ പാതയോരത്താണ് ജയറാമിനെ മരിച്ച നിലയില്‍ കണ്ടെത്തിയത്. നാലുകോടിയുടെ വായ്പ തിരിച്ചുനല്‍കാത്തതിനെ തുടര്‍ന്ന് രാകേഷ് റെഡ്ഡി ജയറാമിനെ കൊലപ്പെടുത്തിയെന്നാണ് പൊലിസ് പറയുന്നത്.
തെലുങ്ക് ചാനലായ എക്‌സ്പ്രസ് ടി.വിയുടെ എം.ഡികൂടിയാണ് മരിച്ച ജയറാം. ഈ ചാനല്‍ ഇപ്പോള്‍ പ്രവര്‍ത്തിക്കുന്നില്ല. ഫ്‌ളോറിഡയില്‍ താമസമാക്കിയ ജയറാം ഹൈദരാബാദില്‍ ബിസിനസ് ആവശ്യങ്ങള്‍ക്കായി വരാറുണ്ട്. റിയല്‍ എസ്റ്റേറ്റ് ഏജന്റായ രാകേഷ് റെഡ്ഡിയില്‍ നിന്ന് വാങ്ങിയ പണം തിരികെ നല്‍കാതിരുന്നതിനെ തുടര്‍ന്ന് ജയറാമിനുമേല്‍ കനത്ത സമ്മര്‍ദമുണ്ടായിരുന്നു.

നിരന്തരം ഫോണ്‍ വന്നതിനെ തുടര്‍ന്ന് രാകേഷിന്റെ ഫോണ്‍ നമ്പര്‍ ജയറാം ബ്ലോക്ക് ചെയ്തിരുന്നു. എന്നാല്‍ എങ്ങനെയെങ്കിലും പണം തിരികെ കിട്ടുന്നതിനായി ഒരു യുവതിയുടെ ചിത്രം വച്ച് വാട്‌സ്ആപ് അക്കൗണ്ട് ഉണ്ടാക്കി ഇയാളെ കെണിയില്‍പ്പെടുത്തുകയായിരുന്നു. വാട്‌സ്ആപ് വഴി ലഭിച്ച നിര്‍ദേശത്തെ തുടര്‍ന്ന് ഏതാനും ദിവസങ്ങള്‍ക്ക് മുന്‍പ് ഹൈദരാബാദില്‍ എത്തിയ ജയറാമിനെ റെഡ്ഡി കെണിയില്‍ പെടുത്തുകയായിരുന്നു. ജൂബിലി ഹില്‍സിലെ വസതിയില്‍ എത്തണമെന്ന് നിര്‍ദേശം ലഭിച്ചതിനെ തുടര്‍ന്ന് ഇവിടെയെത്തിയ ജയറാമില്‍ നിന്ന് റെഡ്ഡിയും സംഘവും പണം ആവശ്യപ്പെട്ടു.
എന്നാല്‍ ആറ് ലക്ഷം രൂപ നല്‍കാമെന്ന് ഉറപ്പ് നല്‍കിയെങ്കിലും ഇത് അംഗീകരിക്കാന്‍ രാകേഷ് റെഡ്ഡി തയാറായില്ല. തുടര്‍ന്ന് നടന്ന വാക്കേറ്റത്തില്‍ തലക്ക് അടിയേറ്റ് ജയറാം മരിച്ചു.

തുടര്‍ന്ന് ജയറാമിന്റെ കാറില്‍ തന്നെ മൃതദേഹം കിടത്തി വിജയവാഡക്കടുത്ത് ഹൈവേയില്‍ ഉപേക്ഷിക്കുകയായിരുന്നുവെന്ന് പൊലിസ് അറിയിച്ചു.