നജീബ് മുറ്റിച്ചൂര്‍

അന്തിക്കാട്: മണലൂര്‍ താഴം കോള്‍ പടവില്‍ സ്വന്തമായി വിതച്ചും കൊയ്തും വിശ്വംഭരന്‍ മോഹിനി ദമ്പതികള്‍ക്ക് വേറിട്ട ഹരിതപാത. കോള്‍ പാടങ്ങളിലെ നെല്‍കൃഷി പൂര്‍ണമായും യന്ത്രവല്‍ക്കരണത്തിന് വഴിമാറിയ കാലത്താണ് അറുപത്തിയഞ്ചിന്റെ നിറവിലും സ്വന്തമായി കൃഷി ചെയ്ത് ദമ്പതികള്‍ മാതൃകയാകുന്നത്. മണലൂര്‍ താഴം കോള്‍ പടവില്‍ തന്റെ 29 സെന്റ് നിലത്തില്‍ കാല്‍ നൂറ്റാണ്ടായി നിലമൊരുക്കലും കൊയ്ത്തും മെതിയുമെല്ലാം ചെയ്യുന്നത് വേളൂക്കാട്ടില്‍ വിശ്വംഭരനും ഭാര്യ മോഹിനിയുമാണ്. വിശ്വംഭരനു പ്രായം 65 ഉം മോഹിനിയ്ക്ക് 63 ഉം ആണ്.
പ്രായാധിക്യത്തിലും സ്വന്തമായി അധ്വാനിച്ച് മറ്റു കര്‍ഷകര്‍ക്കും യുവാക്കള്‍ക്കും മാതൃകയാവുകയാണ് ഈ ദമ്പതികള്‍. 25 വര്‍ഷം മുന്‍പാണ് മണലൂര്‍ താഴം കേള്‍പടവില്‍ വിശ്വംഭരന്‍ സ്വന്തമായി 29 സെന്റ് നിലം വാങ്ങിയത്. അന്നു മുതല്‍ വിശ്വംഭരന്റെ കോള്‍ പാടത്ത് കൊയ്ത്തുയന്ത്രത്തിന്റെ ആരവങ്ങളില്ല. വിതയും കൊയ്ത്തും കറ്റ മെതിക്കലുമെല്ലാം ഇവര്‍ തന്നെ സ്വന്തമായി ചെയ്യുന്നു. ഇതുവരെയും പതിവ് തെറ്റിച്ചിട്ടില്ലെന്ന് വിശ്വംഭരന്‍ പറഞ്ഞു. വിശ്വംഭരനും മോഹിനിയും ചേര്‍ന്ന് ഒറ്റ ദിവസം കൊണ്ടാണ് 29 സെന്റ് നിലംകൊയ്തത്. അരിവാള്‍ ഉപയോഗിച്ച് കൈ കൊയ്ത്ത് നടത്തിയ നെല്‍ച്ചെടികള്‍ പാടത്ത് ഉണങ്ങാനായി വിതറിയിട്ടു. അടുത്ത ദിവസം വിതറിയിട്ട നെല്‍ച്ചെടികള്‍ കറ്റയാക്കി കെട്ടി. പിന്നീട് ഇരുവരും ചേര്‍ന്ന് കാലില്‍ മെതിച്ചു. 140 പറ നെല്ലാണ് ഇവര്‍ക്ക് ലഭിച്ചത്. രാസവളം അപൂര്‍വമായിട്ടാണ് ഉപയോഗിച്ചിട്ടുള്ളത്. കാഞ്ഞാണി പുത്തന്‍ കളത്തിനു സമീപം താമസിക്കുന്ന വിശ്വംഭരന് മണലൂര്‍ പഞ്ചായത്തിലെ മികച്ച കര്‍ഷകനുള്ള അവാര്‍ഡ് ലഭിച്ചിട്ടുണ്ട്.