റിയോ ഡി ജനീറോ: ബ്രസീലിലെ പ്രമുഖ ഫുട്‌ബോള്‍ ക്ലബ്ബിലുണ്ടായ തീപിടിത്തത്തില്‍ പത്തുപേര്‍ മരിച്ചു. ഫ്‌ളെമിംഗോയുടെ ജൂനിയര്‍ ടീമിനെ പരിശീലിപ്പിക്കുന്ന ക്ലബ്ബിലെ ഡോര്‍മെട്രിയിലാണ് ദുരന്തം ഉണ്ടായത്. രണ്ടുമാസം മുന്‍പ് മാത്രം പുതുക്കിപ്പണിത ക്ലബ്ബിന്റെ ഡോര്‍മെട്രിയില്‍ പുലര്‍ച്ചെ താരങ്ങള്‍ ഉറങ്ങുന്നതിനിടെയാണ് സംഭവം. മരിച്ചവരില്‍ താരങ്ങളും ഉള്‍പ്പെട്ടിട്ടുണ്ട്. മരിച്ചവരെല്ലാം 14നും 17നും ഇടയില്‍ പ്രായമുള്ളവരാണ്.
തീപിടിത്തത്തില്‍ കത്തിയമര്‍ന്ന മേല്‍ക്കൂരയും ചാരമായ പരിശീലന വസ്തുക്കളുടെയും ചിത്രങ്ങള്‍ പ്രാദേശികമാധ്യമങ്ങള്‍ പുറത്തുവിട്ടു. ബ്രസീലിയന്‍ ഇതിഹാസ താരങ്ങളായ റൊണാള്‍ഡീഞ്ഞോ, ബെബറ്റോ, റൊമാരിയോ തുടങ്ങിയവര്‍ ഫുട്‌ബോള്‍ പരിശീലിച്ചുവളര്‍ന്ന ക്ലബ്ബാണിത്.