ചെന്നൈ: തമിഴ്‌നാട് നിയമസഭയില്‍ എടപ്പാടി പളനിസാമിയുടെ വിശ്വാസവോട്ടെടുപ്പിനിടെ നടന്ന സംഭവങ്ങളുടെ വിഡിയോ പകര്‍പ്പ് ഡി.എം.കെ വര്‍ക്കിങ് പ്രസിഡന്റ് സ്റ്റാലിന് നല്‍കാന്‍ നിയമസഭാ സെക്രട്ടറിയോട് ഹൈക്കോടതി കര്‍ശനമായി നിര്‍ദേശിച്ചു. ഫെബ്രുവരി 18നു നടന്ന അനിഷ്ട സംഭവങ്ങളുമായി ബന്ധപ്പെട്ട് വിശദമായ വാദം കേള്‍ക്കണമെന്ന് ആവശ്യപ്പെട്ട് സ്റ്റാലിന്‍ മദ്രാസ് ഹൈക്കോടതിയില്‍ സമര്‍പ്പിച്ച പൊതുതാല്‍പര്യ ഹരജിയിലാണിത്.രഹസ്യ വോട്ടെടുപ്പ് നടത്തണമെന്ന ഡി.എം.കെയുടെയും പനീര്‍ശെല്‍വത്തിന്റെ നേതൃത്വത്തിലുള്ള വിമത എ.ഐ.എ.ഡി.എം.കെ എം.എല്‍.എമാരുടെയും ആവശ്യം സ്പീക്കര്‍ തള്ളിയതിനെ തുടര്‍ന്നാണ് നിയമസഭയില്‍ ഉന്തും തള്ളും സ്പീക്കറുടെ ഡയസ് കൈയേറ്റവുമടക്കമുള്ള അനിഷ്ട സംഭവങ്ങള്‍ നടന്നത്. തുടര്‍ന്ന് ഡി.എം.കെ എം.എല്‍.എമാരെ പുറത്താക്കിയാണ് വിശ്വാസ വോട്ടെടുപ്പ് നടന്നത്. വിശ്വാസവോട്ടെടുപ്പ് അസാധുവാണെന്ന് കാണിച്ചാണ് സ്റ്റാലിന്‍ കോടതിയില്‍ പൊതുതാല്‍പര്യ ഹരജി സമര്‍പ്പിച്ചത്. സംഭവത്തിന്റെ വിശദമായ വിഡിയോ പകര്‍പ്പ് സ്റ്റാലിനു നല്‍കണമെന്ന് നിയമസഭാ സെക്രട്ടറിയോട് നേരത്തെ തന്നെ കോടതി നിര്‍ദേശിച്ചിരുന്നു. എന്നാല്‍, ഇതുണ്ടായില്ലെന്ന് സ്റ്റാലിന്റെ അഭിഭാഷകന്‍ ആര്‍. ശണ്‍മുഖദാസ് സുന്ദരം ആക്ടിങ് കോടതി മുന്‍പാകെ പരാതി സമര്‍പ്പിക്കുകയായിരുന്നു.