വടകര: അരൂര്‍ എം.എല്‍.പി സ്‌കൂളിന്റെ ഒരു വര്‍ഷം നീളുന്ന ശതാബ്ദി ആഘോഷത്തിന് നാളെ തുടക്കമാവും. ആഘോഷ പരിപാടികള്‍ മന്ത്രി ടി.പി രാമകൃഷ്ണന്‍ വൈകീട്ട് നാലിന് ഉദ്ഘാടനം ചെയ്യുമെന്ന് സംഘാടക സമിതി ഭാരാവാഹികള്‍ വാര്‍ത്താ സമ്മേളനത്തില്‍ അറിയിച്ചു.
പാറക്കല്‍ അബ്ദുല്ല എം.എല്‍എ അധ്യക്ഷനാകും. ഗാനരചയിതാവ് രമേശ് കാവില്‍ മുഖ്യ പ്രഭാഷണം നടത്തും. പൂര്‍വ അധ്യാപകരെ പഞ്ചായത്ത് പ്രസിഡന്റ് കെ. അച്ചുതന്‍ ആദരിക്കും. ജില്ലാപഞ്ചായത്ത് മെംബര്‍ ടി.കെ രാജന്‍ വിവിധ മത്സര വിജയികള്‍ക്ക് സമ്മാന ദാനം നടത്തും. രണ്ട് കോടിയോളം രൂപ ചെലവ് പ്രതീക്ഷിക്കുന്ന വികസന പദ്ധതികള്‍ ഒരു വര്‍ഷം കൊണ്ട് പൂര്‍ത്തീകരിക്കും. സ്‌കൂളിന് ലൈബ്രറി, വിദ്യാര്‍ഥികള്‍ക്കും നാട്ടുകാര്‍ക്കും ഉപകരിക്കുന്ന കളിസ്ഥലം, പരിസ്ഥിതി സംരക്ഷണം, പുരയിട കൃഷി വികസനം ഉള്‍പ്പെടയുള്ളവക്ക് രൂപം നല്‍കിയതായി ഭാരാവാഹികള്‍ അറിയിച്ചു. മേഖലയിലെ വീടുകളിലും റോഡ് വശങ്ങളിലും 2,500 വൃക്ഷ തൈകള്‍ നട്ട് സംരക്ഷിക്കും. നാട്ടിന്‍പുറങ്ങളില്‍ അന്യമായി കൊണ്ടിരിക്കുന്ന വിവിധ കൃഷികള്‍ പ്രോത്സാഹിപ്പിക്കും. ഇതിനാവശ്യമായ വിത്തുകള്‍ ഇതിനകം ശേഖരിച്ചിട്ടുണ്ട്. വാര്‍ത്താ സമ്മേളനത്തില്‍ ഭാരാവാഹികളായ എം. വിജയന്‍, പി.കെ കണാരന്‍, കെ. ഹരിദാസന്‍, പി.കെ രാധാകൃഷ്ണന്‍, യു.കെ രജീഷ് പങ്കെടുത്തു.