തിരുവനന്തപുരം: വിദ്യാലയങ്ങളില്‍ ദേശീയ നൈപുണിക വിദ്യാഭ്യാസ പദ്ധതി നടപ്പാക്കുന്നതിന്റെ മറവില്‍ സംസ്ഥാനത്തെ വി.എച്ച്.എസ്.ഇ വിദ്യാലയങ്ങള്‍ തകര്‍ക്കാനുള്ള സര്‍ക്കാര്‍ തീരുമാനം പിന്‍വലിക്കണമെന്ന് കെ.എസ്.ടി.യു സംസ്ഥാന കമ്മിറ്റി ആവശ്യപ്പെട്ടു.
389 വി.എച്ച്.എസ്.സി വിദ്യാലയങ്ങളില്‍ 66 എണ്ണത്തിലാണ് എന്‍.എസ്.ക്യു.എഫ് അനുസരിച്ചുള്ള പാഠ്യപദ്ധതി നടപ്പാക്കുന്നത്. വി.എച്ച്.എസ്.ഇകളില്‍ 35 കോഴ്‌സുകളാണ് നിലവിലുള്ളത്.
എന്നാല്‍ എന്‍.എസ്.ക്യു.എഫ് പദ്ധതി പ്രകാരം 12 കോഴ്‌സുകള്‍ മാത്രമാണുള്ളത്. 630 മണിക്കൂര്‍ പഠിപ്പിക്കേണ്ട സ്ഥാനത്ത് 300 മണിക്കൂറായി ചുരുങ്ങുകയുമാണ്. ഭോപ്പാല്‍ പണ്ഡിറ്റ് സുന്ദര്‍ലാല്‍ ശര്‍മ്മ കോളജ് ഓഫ് വൊക്കേഷനല്‍ ഇന്‍സ്റ്റിറ്റ്യൂട്ട് എന്ന സ്ഥാപനത്തിന്റെ സാങ്കേതിക സഹായത്തോടെയാണ് ഇത് കേരളത്തില്‍ നടപ്പാക്കുന്നത്.
9,10 ക്ലാസുകളില്‍ അടുത്ത അധ്യയന വര്‍ഷം മുതല്‍ തൊഴില്‍ നൈപുണിക വിദ്യാഭ്യാസം കരിക്കുലത്തിന്റെ ഭാഗമാക്കുമെന്ന് ഫെബ്രുവരിയില്‍ ചേര്‍ന്ന കരിക്കുലം കമ്മിറ്റി തീരുമാനിച്ചിരുന്നു. അതിന്റെ ചുവട് പിടിച്ചാണ് ഇത് നടപ്പാക്കുന്നതെന്നാണ് വകുപ്പ് മന്ത്രിയുടെ വിശദീകരണം. എന്നാല്‍ ഇതുമായി ബന്ധപ്പെട്ട കരിക്കുലം മാറ്റമോ സിലബസ് പരിഷ്‌കരണമോ അധ്യാപക പരിശീലനമോ നടന്നിട്ടില്ല.
അതുകൊണ്ട് ധൃതിപിടിച്ചുള്ള ഈ തീരുമാനം വിദ്യാഭ്യാസ മേഖലയില്‍ വലിയ ആശങ്ക ഉണ്ടാക്കുമെന്നും വി.എച്ച്.എസ്.ഇ വിദ്യാലയങ്ങള്‍ തകരാന്‍ ഇടവരുമെന്നും പ്രസിഡന്റ് എ.കെ സൈനുദ്ദീന്‍ പറഞ്ഞു.