ഫറോക്ക്: ടൗണിലെ വ്യാപരസ്ഥാപനങ്ങളില്‍ മോഷണശ്രമം. കരുവന്‍തിരുത്തി സര്‍വിസ് സഹകരണ ബാങ്കിന്റെ ബാങ്ക് മാള്‍, മൊബൈല്‍ ഷോപ്പ്, ബുക്ക് സ്റ്റാള്‍, വാഴക്കുല കട എന്നിവടങ്ങളിലാണ് മോഷണംശ്രമം നടന്നത്. വ്യാപാരസ്ഥാപനങ്ങളുടെ ഷട്ടറിന്റെ ലോക്ക് പൊളിച്ചു അകത്തു കടന്ന മോഷ്ടാക്കള്‍ സാധനങ്ങളെല്ലാം വലിച്ചുവാരി പുറത്തിട്ടുണ്ട്. കഴിഞ്ഞദിവസം അര്‍ധരാത്രിയിലാണ് മോഷണശ്രമം നടന്നത്.
ബാങ്ക് മാളിനുള്ളിലെ നീതി സൂപ്പര്‍ മാര്‍ക്കറ്റ്, പച്ചക്കറി സ്റ്റാള്‍, ഹോം ആന്‍ഡ് നീഡ്‌സ്, മാളിന്റെ ഓഫിസ് എന്നിവിടങ്ങളിലാണ് മോഷണശ്രമം നടത്തിയത്. ഓഫിസിനുള്ളില്‍ സൂക്ഷിച്ചിരുന്ന 4,500 രൂപ കളവ് പോയി. മേശ വലിപ്പ് പൊളിച്ചാണ് പണം കവര്‍ന്നത്. ബാങ്ക് മാളിന്റെ ലോക്കറിനും മറ്റും യാതൊരു നാശനഷ്ടവും വരുത്തിയിട്ടില്ല. മാളിനുള്ളിലെ മറ്റു സ്ഥാപനങ്ങളിലും കള്ളന്‍ മോഷണശ്രമം നടത്തിയെങ്കിലും ഒന്നും നഷ്ടപ്പെട്ടിട്ടില്ല. ഫറോക്ക് ബസ് സ്റ്റാന്‍ഡിന്റെ മുന്‍വശത്തെ രാമനാട്ടുകര കൊടക്കാട്ട് ഹൗസില്‍ ഷമീറിന്റെ ഉടമസ്ഥതയിലുള്ള 5.ജി മൊബൈല്‍ ഷോപ്പ്, പള്ളിക്കല്‍ ബസാര്‍ കാവുംപടി നാസറിന്റെ ബനാന സ്റ്റോര്‍, പൂതേരി രജീന്ദ്രന്റെ ബുക്ക് സ്റ്റാള്‍ എന്നിവിടങ്ങളിലെല്ലാം മോഷണശ്രമം നടന്നിട്ടുണ്ടെങ്കിലും ഒന്നും നഷ്ടപ്പെട്ടിട്ടില്ല. ഫറോക്ക് എസ്.ഐ എ. രമേഷ് കുമാറിന്റെ നേതൃത്വത്തില്‍ പൊലിസ് മോഷണശ്രമം നടന്ന കടകളിലെല്ലാം പരിശേധന നടത്തി. ഡോഗ് സ്‌ക്വാഡും സ്ഥലത്തെത്തിയിരുന്നു. ബാങ്ക് മാളിനുള്ളിലെ സി.സി.ടി.വി. ദൃശ്യങ്ങള്‍ പൊലിസ് ശേഖരിച്ചിട്ടുണ്ട്.