ജിദ്ദ: മലപ്പുറം ഉപതെരഞ്ഞെടുപ്പില്‍ യു.ഡി.എഫ് സ്ഥാനാര്‍ഥിയായി മത്സരിക്കുന്ന മുസ്‌ലിം ലീഗ് ദേശീയ ജനറല്‍ സെക്രട്ടറി പി.കെ. കുഞ്ഞാലിക്കുട്ടിക്ക് നോമിനേഷനൊപ്പം കെട്ടിവയ്ക്കാനുള്ള പണം സഊദി കെ.എം.സി.സി നല്‍കുമെന്ന് നാഷണല്‍ കമ്മിറ്റി പ്രസിഡന്റ് കെ.പി. മുഹമ്മദ്കുട്ടിയും ജനറല്‍ സെക്രട്ടറി അഷ്‌റഫ് വേങ്ങാട്ടും അറിയിച്ചു.

ഏപ്രില്‍ 12ന് നടക്കുന്ന ഉപതെരഞ്ഞെടുപ്പിന് മുന്നോടിയായി കെ.എം.സി.സി വിപുലമായ പ്രചാരണ പരിപാടികളാണ് ആസൂത്രണം ചെയ്യുന്നത്. കീഴ്ഘടകങ്ങള്‍ക്ക് നാഷണല്‍ കമ്മിറ്റി ഇതു സംബന്ധിച്ച് സര്‍ക്കുലര്‍ നല്‍കിയിട്ടുണ്ട്. സെന്‍ട്രല്‍ കമ്മിറ്റികള്‍, ജില്ലാ മണ്ഡലം പഞ്ചായത്ത് ഏരിയ കമ്മിറ്റികളുടെ പങ്കാളിത്തം ഉറപ്പുവരുത്തുന്ന തെരഞ്ഞെടുപ്പ് കാംപയിനാണ് നാഷണല്‍ കമ്മിറ്റി നടത്തുന്നതെന്നും ഇവര്‍ അറിയിച്ചു.