നീലേശ്വരം: പ്ലസ് വണ്‍ പ്രവേശനത്തിനു രണ്ടു മാര്‍ക്കിന്റെ വെയിറ്റേജ് ലഭിക്കുന്നതിനായി ജില്ലയില്‍ ആയിരത്തോളം പേര്‍ നീന്തല്‍ സര്‍ട്ടിഫിക്കറ്റ് ഹാജരാക്കിയെങ്കിലും ട്രയല്‍സിനെത്തിയത് ഇരുനൂറോളം പേര്‍ മാത്രം. തദ്ദേശ സ്വയംഭരണ സ്ഥാപനങ്ങളുടെയും നഗരസഭകളുടെയും അധികാരികളെ കണ്ടാണ് പലരും നീന്തല്‍ അറിയാമെന്ന സര്‍ട്ടിഫിക്കറ്റ് തരപ്പെടുത്തിയത്. ഇതു കാണിച്ച് ജില്ലാ സ്‌പോര്‍ട്‌സ് കൗണ്‍സിലില്‍ നിന്നു സര്‍ട്ടിഫിക്കറ്റ് വാങ്ങി അപേക്ഷയ്‌ക്കൊപ്പം നല്‍കുകയാണ് പതിവ്.
എന്നാല്‍ ഇക്കുറി സര്‍ട്ടിഫിക്കറ്റ് മാത്രം പോരെന്നും നീന്തിക്കാണിക്കണമെന്നുള്ള ഉത്തരവിനെ തുടര്‍ന്നാണു ഇന്നലെ ജില്ലയിലെ നാലു കേന്ദ്രങ്ങളില്‍ നീന്തല്‍ ട്രയല്‍സ് നടത്തിയത്. മാന്യയിലെ വിന്‍ടച്ച് സ്വിമ്മിങ് പൂള്‍, പാലാവയല്‍ സ്വിമ്മിങ് പൂള്‍, കാഞ്ഞങ്ങാട് സദ്ഗുരു പബ്ലിക് സ്‌കൂള്‍ സ്വിമ്മിങ് പൂള്‍ എന്നിവിടങ്ങളിലാണു വിദഗ്ധ നീന്തല്‍ പരിശീലകരുടെ സാന്നിധ്യത്തില്‍ ട്രയല്‍സ് നടത്തിയത്. മൂന്നു കേന്ദ്രങ്ങളിലുമായി ഇരുനൂറോളം പേരാണ് എത്തിയത്. അപേക്ഷിക്കാനുള്ള സമയം 30 വരെ നീട്ടിയതോടെ ഒരു തവണ കൂടി ഈ കേന്ദ്രങ്ങളില്‍ ട്രയല്‍സ് നടത്താനാണു തീരുമാനം.
അന്ന് ഇവിടങ്ങളിലെത്തി നീന്തിയവര്‍ക്കു മാത്രമേ രണ്ടു മാര്‍ക്ക് വെയിറ്റേജ് നല്‍കേണ്ടതുള്ളൂവെന്നാണു തീരുമാനം.