ചെങ്ങന്നൂര്‍: കര്‍ണാടക തെരെഞ്ഞെടുപ്പില്‍ നോട്ടയോട് പോലും ജയിക്കാന്‍ കഴിയാത്ത സി.പി.എം ബി.ജെ.പിക്ക് ബദലാണെന്ന് സ്വയം വീമ്പിളക്കുകയാണെന്നു മുന്‍മന്ത്രി ഷിബു ബേബി ജോണ്‍ പറഞ്ഞു.വെണ്മണിയില്‍ നടന്ന കുടുംബ സംഗമം ഉദ്ഘാടനം ചെയ്യുകയായിരുന്നു അദ്ദേഹം.കര്‍ണാടകത്തില്‍ സി.പി.എം മത്സരിച്ച 17 മണ്ഡലങ്ങളില്‍ ഏഴെണ്ണത്തില്‍ ബിജെപി ജയിച്ചു. മതേതര വോട്ടുകള്‍ ഭിന്നിപ്പിച്ചു ബി.ജെ.പിയുടെ വിജയം ഉറപ്പാക്കലാണ് സി.പി.എം ചെയ്യുന്നത്.
എന്നിട്ടും ചെങ്ങന്നൂരില്‍ സി.പി.എം പറയുന്നത് ബി.ജെ.പിയെ തളയ്ക്കുന്ന പാര്‍ട്ടി അവരാണെന്ന്.ഈ വര്‍ഷത്തെ ഏറ്റവും മികച്ച തമാശയാണിത്. കര്‍ണാടകത്തില്‍ കഴിഞ്ഞ ലോക്‌സഭാ തെരെഞ്ഞെടുപ്പില്‍ ബി.ജെ.പി നേടിയ 42 ശതമാനം വോട്ട് ഇത്തവണ 36 ശതമാനമായി കുറഞ്ഞു.കോണ്‍ഗ്രസിന്റെ വോട്ട് 38 ശതമാനമായി വര്‍ധിച്ചു.
ജെഡിഎസുമായി ഒരുമിച്ചു കോണ്‍ഗ്രസിന് ബി.ജെ.പിയെ അധികാരത്തില്‍ നിന്ന് പുറത്താക്കാന്‍ കഴിഞ്ഞു.ജനാധിപത്യത്തിന്റെ വിജയമാണിതെന്ന് അദ്ദേഹം പറഞ്ഞു.എട്ട് ഉപദേശികളുള്ള മുഖ്യമന്ത്രിക്ക് മനുഷ്യത്വം ഉപദേശിക്കാന്‍ ഒരാളെക്കൂടി നിയമിക്കണം.ബി.ജെ.പി -സി.പി.എം രാഷ്ട്രീയ കൊലപാതകം നടന്നപ്പോള്‍ സിപിഎം കാരന്റെ വീട്ടില്‍ മാത്രമാണ് മുഖ്യമന്ത്രി പോയത്.വരാപ്പുഴയില്‍ പോലീസ് മര്‍ദ്ദിച്ചു കൊന്ന ശ്രീജിത്തിന്റെ വീട്ടില്‍ പോകാന്‍ തയാറായില്ല എന്നും ഷിബു ബേബി ജോണ്‍ ചൂണ്ടിക്കാട്ടി.