കാസര്‍കോട്: മഴ കനത്തതോടെ കാസര്‍കോട് ജില്ലയിലെ വിവിധ ഭാഗങ്ങളില്‍ കെടുതികളും വ്യാപകമാകുന്നു. രണ്ടു ദിവസമായി കനത്ത കാറ്റിലും മഴയിലും പലയിടങ്ങളിലുമായി തകര്‍ന്നത് 15 ഓളം വീടുകളാണ്. വന്‍തോതിലുള്ള കൃഷിനാശവും സംഭവിക്കുന്നുണ്ട്. പുഴകളും തോടുകളും കരകവിഞ്ഞ് ഒഴുകാന്‍ തുടങ്ങിയത് വെള്ളപ്പൊക്കത്തിനും കാരണമാകുന്നു. മഴ ഇപ്പോഴത്തെ രീതിയില്‍ ശക്തമായി തുടര്‍ന്നാല്‍ കെടുതികളുടെ വ്യാപ്തിയും വര്‍ധിക്കും. വീടുകള്‍ തകര്‍ന്നതില്‍ 2.38 ലക്ഷത്തിന്റെ നഷ്ടമാണ് കണക്കാക്കുന്നത്. ജില്ലയില്‍ തിങ്കളാഴ്ച 50 മില്ലിമീറ്റര്‍ മഴ പെയ്തതായി കണ്‍ട്രോള്‍ റൂമില്‍നിന്നും അറിയിച്ചു.