തിരൂര്‍: ചെമ്പ്ര പ്രദേശത്തെ ജനങ്ങള്‍ ആശ്രയിക്കുന്ന പ്രാഥമികാരോഗ്യ കേന്ദ്രം ശോചനീയാവസ്ഥയില്‍. ഡോക്ടര്‍മാരുട സേവനവും മരുന്നും വേണ്ടവിധം ലഭ്യമാക്കാതെ ഹെല്‍ത്ത് സെന്റര്‍ പേരിലൊതുങ്ങുന്നതായാണ് പരാതി.
പ്രാഥമികാരോഗ്യ കേന്ദ്രം കെട്ടിടത്തിന്റെ സ്ഥിതിയും അത്ര നന്നല്ല. വര്‍ഷങ്ങള്‍ക്ക് മുന്‍പ് പ്രാഥമികാരോഗ്യ കേന്ദ്രത്തിന് 20 ലക്ഷം രൂപ എം.പി ഫണ്ട് അനുവദിച്ചിരുന്നെങ്കിലും പിന്നീട് കാര്യമായ പരിഗണന ലഭിക്കാതെ ആരോഗ്യ കേന്ദ്രത്തിന്റെ പ്രവര്‍ത്തനം താളം തെറ്റുകയായിരുന്നു.
ഇപ്പോഴും രോഗികളില്‍ പലരും ആശ്രയിക്കുന്നുണ്ടെങ്കിലും അവര്‍ക്കാവശ്യമായ പ്രാഥമികസൗകര്യങ്ങള്‍ പോലും ഉറപ്പുവരുത്താന്‍ അധികൃതര്‍ക്കാകാത്ത സ്ഥിതിയാണ്. പ്രാഥമികാരോഗ്യ കേന്ദ്രത്തിന്റെ ശോചനീയാവസ്ഥയ്ക്ക് പരിഹാരം കാണണമെന്നാവശ്യപ്പെട്ട് ഇതിനകം പല രാഷ്ട്രീയ പാര്‍ട്ടികളും രംഗത്തുവന്നിട്ടുണ്ടെങ്കിലും പ്രശ്‌നപരിഹാരത്തിന് നടപടി വൈകുകയാണ്.