റിയോ ഡി ജനീറോ: പരുക്കേറ്റ് വിശ്രമത്തിലായിരുന്ന സൂപ്പര്‍ താരം നെയ്മര്‍ ബ്രസീല്‍ ടീമിന്റെ പരിശീലന ക്യാംപിലെത്തി. പാരിസില്‍ നിന്ന് തിരിച്ചെത്തിയ താരം ടീമംഗങ്ങള്‍ക്കൊപ്പം പരിശീലനം ആരംഭിച്ചു. ബ്രസീല്‍ ലോകകപ്പ് ടീമിന്റെ പരിശീലനം നടക്കുന്ന റിയോ ഡി ജനീറോയിലെ ഗ്രഞ്ജ കൊമരി പരിശീലന മൈതാനത്താണ് താരം പന്ത് തട്ടിയത്. ഒപ്പം ഗബ്രിയേല്‍ ജീസസും ഡാനിലോയുമുണ്ടായിരുന്നു. മെഡിക്കല്‍ പരിശോധനകള്‍ പൂര്‍ത്തിയാക്കിയ ശേഷമാണ് നെയ്മര്‍ പരിശീലനം പുനരാരംഭിച്ചത്.
കഴിഞ്ഞ തവണ സ്വന്തം നാട്ടില്‍ അരങ്ങേറിയ ലോകകപ്പിന്റെ സെമിയില്‍ ജര്‍മനിയോട് 7-1ന്റെ നാണംകെട്ട പരാജയമേറ്റുവാങ്ങിയ പോരാട്ടത്തില്‍ ബ്രസീല്‍ ടീമിനായി നെയ്മര്‍ കളത്തിലിറങ്ങിയിരുന്നില്ല. പരുക്കേറ്റതിനെ തുടര്‍ന്നായിരുന്നു നെയ്മര്‍ പുറത്തിരുന്നത്.
ഇത്തവണ ആ നാണക്കേട് മായ്ച്ചു കളഞ്ഞ് കിരീടം സ്വന്തമാക്കുകയാണ് സെലക്കാവോകളുടെ ലക്ഷ്യം. യുവത്വവും പരിചയ സമ്പത്തുമുള്ള പ്രതിഭാധനരായ താരങ്ങളുമായാണ് കാനറികള്‍ റഷ്യയില്‍ കളിക്കാനൊരുങ്ങുന്നത്.