ഹിദായനഗര്‍: ദാറുല്‍ഹുദാ ഇസ്‌ലാമിക് സര്‍വകലാശാല പൂര്‍വ വിദ്യാര്‍ഥി സംഘടന ഹുദവീസ് അസോസിയേഷന്‍ ഹാദിയ സംഘടിപ്പിച്ച അഞ്ചാമത് റമദാന്‍ പ്രഭാഷണ പരമ്പരക്ക് ഹിദായ നഗറില്‍ ഉജ്ജ്വല സമാപ്തി.
അഞ്ചുദിവസങ്ങളിലായി നടന്ന പ്രഭാഷണ പരിപാടിയുടെ സമാപന സമ്മേളനം ദാറുല്‍ഹുദാ ചാന്‍സലര്‍ കൂടിയായ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്തു. റമദാന്‍ വിശ്വാസികള്‍ക്ക് കൂടുതല്‍ സുകൃതങ്ങള്‍ ചെയ്തുതീര്‍ക്കാന്‍ കരുത്ത് നല്‍കുന്ന മാസമാണെന്നും വ്യക്തിശുദ്ധി നേടിയെടുക്കുന്നതിന് റമദാന്‍ വിനിയോഗിക്കണമെന്നും തങ്ങള്‍ പറഞ്ഞു. സഹജീവികളുടെ ദുഃഖമകറ്റുന്നതിനും ജീവകാരുണ്യപ്രവര്‍ത്തനങ്ങളില്‍ സജീവമാകുന്നതിനും പ്രത്യേകം ശ്രദ്ധിക്കണമെന്നു തങ്ങള്‍ ഉണര്‍ത്തി.
ദാറുല്‍ഹുദാ ജനറല്‍ സെക്രട്ടറി ചെമ്മുക്കന്‍ കുഞ്ഞാപ്പു ഹാജി അധ്യക്ഷനായി. മുസ്തഫ ഹുദവി ആക്കോട് പ്രഭാഷണം നടത്തി. വി.പി അബ്ദുല്ലക്കോയ തങ്ങള്‍ മമ്പുറം, സി. യൂസുഫ് ഫൈസി മേല്‍മുറി, യു. ശാഫി ഹാജി ചെമ്മാട്, ഹംസ ഹാജി മൂന്നിയൂര്‍, ബാവ ഹാജി ചിറമംഗലം, മുക്ര അബൂബക്കര്‍ ഹാജി, സി.കെ മുഹമ്മദ് ഹാജി സംസാരിച്ചു. സി.എച്ച് ശരീഫ് ഹുദവി സ്വാഗതവും പി.കെ നാസിര്‍ ഹുദവി കൈപ്പുറം നന്ദിയും പറഞ്ഞു.