കാസര്‍കോട്: ട്രെയിനില്‍ ഉപേക്ഷിച്ച നിലയിലുള്ള കഞ്ചാവ് കണ്ടെത്തി. മംഗളൂരു-ചെന്നൈ മെയിലിലെ (12602) പിറകിലെ ജനറല്‍ കോച്ചില്‍ നിന്നാണ് എക്‌സൈസ് ഇന്റലിജന്‍സ് വിഭാഗം കഞ്ചാവ്-പാന്‍മസാല ഉല്‍പന്നങ്ങള്‍ പിടികൂടിയത്. രണ്ട് ട്രോളിബാഗുകളിലായി സൂക്ഷിച്ച നിലയിലായിരുന്നു ഇവ.
ആര്‍.പി.എഫ്, എക്‌സൈസ്, ഇന്റലിജന്‍സ് കാസര്‍കോട് എന്നിവയുടെ സംയുക്ത പരിശോധനയാണ് ട്രെയിനില്‍ നടന്നത്. മംഗളൂരു ആര്‍.പി.എഫ് ഇന്‍സ്‌പെക്ടര്‍ പി. ഫിറോസിന്റെ നേതൃത്വത്തില്‍ ഉദ്യോഗസ്ഥരായ സി.പി സുരേഷ്, പി. അനില്‍, വി.വി സഞ്ജയ്കുമാര്‍, എക്‌സൈസ് ഉദ്യോഗസ്ഥരായ വിനയരാജ്, വി.ഡി സന്തോഷ്, വി. സന്തോഷ് എന്നിവര്‍ പരിശോധനയില്‍ പങ്കെടുത്തു. അതേസമയം ബാഗിന്റെ ഉടമയെ കണ്ടെത്താനായില്ല. പരിശോധന മണത്തറിഞ്ഞ പ്രതികള്‍ ബാഗ് ഉപേക്ഷിച്ച് സ്ഥലം വിട്ടതായാണ് സംശയിക്കുന്നത്. രണ്ടു ലക്ഷം രൂപയോളം വിലവരുന്നതാണ് കഞ്ചാവും മറ്റു ലഹരി വസ്തുക്കളുമെന്നാണ് സൂചന.