ബൈറൂത്: ലെബനോനിലെ ഫിലിപ്പൈൻസ് അംബാസിഡർ ബെർണാർഡിറ്റ കറ്റല്ല കോവിഡ്-19 വൈറസ് ബാധയേറ്റു മരിച്ചു. ഫിലിപ്പൈൻസ് വിദേശ കാര്യ മന്ത്രാലയമാണ് ഇക്കാര്യം അറിയിച്ചത്. വ്യാഴാഴ്ച്ച പുലർച്ചെ ബൈറൂത്ത് ആശുപത്രീയിൽ വെച്ചായിരുന്നു അന്ത്യം. 62 കാരിയായ ബെർണാർഡിറ്റ കറ്റല്ല 27 വർഷമായി ഫിലിപ്പൈൻ വിദേശ കാര്യ മന്ത്രാലയത്തിന് കീഴിൽ പ്രവർത്തിച്ചു വരികയായിരുന്നു. അംബാസിഡറുടെ നിര്യാണത്തിൽ അഗാധമായ ദുഃഖം രേഖപെപടുത്തുന്നതായി ഫിലിപ്പൈൻസ് വിദേശ കാര്യ മന്ത്രാലയം പ്രസ്‌താവനയിൽ പറഞ്ഞു. 2019 ഡിസംബർ മുതൽ ലെബനോനിൽ ഉണ്ടായ സാമ്പത്തിക പ്രതിസന്ധിയിൽ ദുരിതത്തിലായ ആയിരക്കണക്കിന് ഫിലിപ്പൈൻ സ്വദേശികൾക്ക് വേണ്ട സഹായം ചെയ്യുന്നതിൽ ഇവർ ഏറെ ശ്രദ്ധിക്കപ്പെട്ടിരുന്നു. നിലവിൽ ലെബനോനിൽ 479 വൈറസ് ബാധയാണ് സ്ഥിരീകരിക്കപ്പെട്ടത്. 14 പേർ മരണപ്പെടുകയും ചെയ്‌തിട്ടുണ്ട്‌.